Roma sam

„O khetan butschalinipe le tschulipendar o lek barikanipe hi“ | Dagmar Schindler

I Dagmar Schindler anglobeschti andar o KZ Verband Betsch taj dujto schero le bundakere anglebeschtostar butschalinel le fanecinipeske le tel dschumipeskere grupnenge. Te oj hi jeke dschenenendar, savi le tschatschipenge pe ande bescharel odole dschenenge, save tel dschumim on.

Roma sam | On demand| 26.8.2019
@@@@(filehandler)
id: 697661
kind: audio
@@@@

Upre bartschim ande Mörbisch, jek tschaj schichtakere butjaschendar, use pri baba taj papu upre bartschini. Len hajo sina, kaj o Roma atschnahi, afka la Dagmar Schindlerake „normali sina“, le Romenca upre te bartschol.

Dagmar Schindler beim Roma Gedenktag
Yvonne Erdost
I Dagmar Schindler uso Romengero gondolipe upro Ceija Stojka Platz

O khetan butschalinipe le tschulipendar o lek barikanipe hi, phenel i Schindler. Desto feder khetan terdschim ol, desto buteder schaj resto ol.

Afka te i Zuzana Brejcha le dikel, anglebeschti le tschechitike slovakisch austritike kontakforumistar: „Me ando flogoskero grupnenger bajrot la tschechitika flogoskera grupnatar som taj ojs naschikeraschkija Betschiste ajom, afka me esbe lav, söbst dscheno jeke tschulipestar, sar le Romenge dschal“.

I Brejcha imar but dokumentarischi filmtscha le Romenca andi Slovakija kertscha taj meresch oj uso Roma dikloi ol.

O 2. august andi cili Europa ojs gondolipeskero di tel likerdo ol taj ando bersch 2015 le Europitike rotistar aunprindschardo lo ulo. Use ada di le epasch milijoni Romenge taj Sintijenge gondolim ol, save maschkar o 2. themeskero haburi mudarde ule. Andi Austrija ada barikano di dschi adi, kekaj butvar andar o redi le flogoskere grupnengere fartreterendar manglo ol, meg na ratificirim ulo. O flogoskere fartertscha solidarisch use ada di talalinen pumen, le dschenenge te gondolinel.

O Bernhard Supper andar o „Freizeitverein Club kreativ“ le pharipeskere punktiha tolerantiskero dschivipe le tel dschumipeskere dschenenca, uso gondolipeskero mulatintschago upro Ceija Stojka Platz use sina. Use ada 2. august sina jek terni Romni i Diana Dworzack andar o farajn „Voices of diversity“, savi amenca uso than geli, kaj agun o Roma dschivnahi. Oj te pedar o politischi entviklinipe la floskera grupnatar le Romendar informacija le dschenenge odoj dija taj sar Europa lenca um dschal, phenel o Bernhard Super. Ov taj leskero farajn pomoschinel moralisch taj te aktiv, sar use ada 2. august schaj diklo ol.

Ada khetan likeripe butendar hi, savo odo schaj kerel, kaj pekamle mangiptscha dim schaj on. Afka andar o suno jeka dschivda flogoskera grupnatar, barikane aunprindscharipe ando khetanipe, politik taj kultura jek loschani rejaliteta le smiromiskere khetandschivipeha le cile manuschenca schaj ol.