Roa sam

Auschwitz | Jek „Synonym“ le mulipeske, o bengalipe, i bibast

Igen tato hi taj eklik o brischind del, use ada 75. berscheskero di. I bareskeri phuv telal o use kerde botschkori esbe te lel hi. Adaj dar tut hi, manuschengere mangiptscha, sar trusch, bok vaj na latscho atschipe adaj esbe te lel hi.

On demand | Roma sam | 12.8.2019

Auschwitz jek avro than hi. Jek rujina, savi te pal 75 berscha palo 2. themeskero haburi palo 2. august 1944 jek esbelipe „Hass“ istar, tradipestar taj dar angle vrischdschanel.

„Zigeunerlager Auschwitz“
Stadtarchiv Ravensburg

O 75. var ada bersch o 2. august sina, sar phenahi i „Zigeunernacht“ andar Auschwitz-Birkenau. Andi rat andar o 2. upro 3. august 1944 murdarde o nacijonalsocijalistscha 3000 Roma – murschen – dschuvlen taj tschaven – ando gasengere khera ande Auschwitz. O 2. august kerel adi o „Internacijonali Romengero holocaust gondolipeskero di“. Andi cili Europa gondolinen o manuscha le opferenge le flogoskere murdaripestar le Romendar taj jek cajchn bescharen gejng o „Antiziganismus“ andi adivesakeri cajt.

O than ando logeri igen baro hi, sar te schoha na ar lo ovlahi. Sako bersch adaj Roma taj Sinti pumen talalinen, dschene save aja bibast prik dschivde taj but schel terne, le murdarde Romenge taj Sintijenge te gondolinel.

Prik dschivdi Sintiza Prigmore kejmpfinel vascho glajchi tschatschiptscha

But dschene ale use ada gondolipe Auschwitzate telende te dschene hi, save aja bibast prik dschivde. Jek tel lendar i 76 berschengeri Sintiza Rita Prigmore hi. Ojs tiknori oj pra phenjaha Rolanda le Josef Mengeleske arbeschardi sina. Dschi adi i duk ando muj ledschel. Lakeri phen adala eksperimentscha na prik dschivtscha. Lakeri daj schaj la Rita befrajintscha taj afka lakero ileto retintscha. Dschi adi kejmpfinel i Rita Prigmore le glajchi tschatschipenge lakera flogoskera grupnake taj gejng o pobisteripe. Rovlunde oj pro phukajipe le ternenge prik del.

The American civil rights activist Rev. Jesse Jackson visits the former Nazi death camp of Auschwitz
AP Photo/Czarek Sokolowski

O Jesse Jackson uso protestscha gejng o „Antiromaismus“ upre vrischdschanel

Use ada gondolipeskero le murdarde Romenge taj Sintijenge ande Auschwitz o vakeripeskero bult tschak le prik dschivde dschenenge Romani Rose, anglebeschto le „Zentralrates Deutscher Sinti taj Roma“, taj le reverend Jesse Jackson use terdschino. O Jesse Jackson terdschol ojs kalo polgarengero tschatschipeskero le viderschtaundiske taj solidaritetake. Ov upre vrischdschanel, le „Antiromaismus“ andi adivesakeri cajt taj o prasajipeskere vakeriptscha gejng o Roma taj Sinti le protestenca te bekejmpfinel.

Romani Rose | Loke, ham sorale alavenca

O hangi le lejcti cajtceugendar loke sina ham sorale alavenca taj viderschtaundiha. O Romani Rose imar but berscha le glajchi tschatschipenge la flogoskera grupnake andi Germanija kejmpfinel. O anav Rose butvar ando kenvi le opferendar le flogoskere murdaripestar le Romendar taj Sintijendar terdschol. But leskera familijatar adaj murdarde ule, tschak tschule aja bibast prik dschivde. Te o Rose la terna generacijatar le Romendar taj Sintijendar mangel, kaj ada bibastalo keripe le nacijonalsocijalistendar schoha na popisterdo te ol.

People gather to commemorate the Roma and Sinti people killed by Nazi Germany in World War II, during ceremonies at Oswiecim, Poland, Friday Aug. 2, 2019.
AP Photo/Czarek Sokolowski

Austritike Roma fartretertscha ande Auschwitz

O 2. august andi cili Europa ojs gondolipeskero di tel likerdo ol. Ande Berlin, Budapest, ande Barcelona taj but avre europitiki fori use ada di le epasch milijoni Romenge taj Sintijenge gondolim ol, save maschkar o 2. themeskero haburi mudarde ule. Dschidokle upro Ceija Stojka Platz ando 7. becirk Betschiste le Romenge taj Sintijenge gondolim ol, te fartertscha andar i Austrija uso 75. internacijonali gondolipeskero mulatintschago ande Auschwitz use hi. Andi Austrija tschak 10% le Romendar taj Sintijendar o genocid prik dschivde. I Manuela Horvath, Roma aktivistkija taj schero andar i Roma-Pastoral Burgenland, lakero papu jek prk dschivdo jeke logeristar sina, kamla ande Auschwitz jek cajchn te bescharel.

Andreas Sarközi, Hannes Sulzenbacher, Manuela Horvath, Albert Lichtblau, Botschafter Werner Almhofer, Generalkonsul Andrzej Tombinski, Michael Doujak (v.l.). Christian Klippl (kniend)
KV Roma
O Andreas Sarközi, o Hannes Sulzenbacher, i Manuela Horvath, o Albert Lichtblau, o botschofteri Werner Almhofer, o generalkonsul Andrzej Tombinski, o Michael Doujak (balutnon). Christian Klippl (upro tschanga).

O Christian Klippl igen soralo resto hi

Fatretertscha but Roma organisacijendar andar o cilo them uso 75. internacijonali gondolipeskero di le Roma holocaustiske ande Auschwitz-Birkenau pumen talalinde. But keresuji tel paschlarde ule. Masckare le manuschendar ando aguno logeri nischta te schunel hi. Te i familija le Christian Klipplistar, anglebeschto le Kuturakere farajnistar le austritike Romendar, ando dujto themeskero haburi tradim, taj murdarde ule. Te ov igen resto sina.

Raymond Gureme (Dritter von links) mit seiner Familie
Courtesy of Raymond Gureme
O Raymond Gureme (Trito balutnon) pra familijaha
Raymond Gureme
Romski Portal Udar
O Raymond Gureme

Raymond Gureme | Viderschtaund gejng o na manuschanipe taj „Antiromaismus“

O Raymond Gureme jek prik dschivdo hi, savo ando erschti redo pro than ande lija. O 95 berschengero francitiko Rom 11 logertscha prik dschija taj ando francitiko viderschtaund kejmpfintscha. Sako bersch uso gondolipeskero mulatintschago ande Auschwitz use lo hi taj la terna generacijatar dschi adi mangel, viderschtaund gejng o na manuschanipe taj „Antiromaismus“ te kerel. Poar thana bajder o Michael Roth beschel, germanitiko schtotiskero ministeri la Europake. Ojs farterteri la bundesrepublikatar phenel lo, hot i Germanija taj i Europa pra vitesijake le flogoskere murdaripeske godschikan iste on, taj i flogoskeri grupn le Romendar ando maschkarutno le khetanipestar te len.

"Dikh He Na Bister – Dik taj na pobister“

Sar sako bersch dschan te ada bersch but schel terne, Roma taj gadsche khetan, andar i cili Europa, telal o anav „Dikh He Na Bister – Dik taj na pobister“ le opferenge le Roma genocidistar te gondolinel. Jek kurko dur vakeren on ande Krakau taj Auschwitz pedar o flogoskero murdaripe, siklon le prik dschivde cajtceugendar pedar o faphagipe le nacijendar taj oja historija afka bajder ledschen. I Soraya Post, Romni taj aguni rotkija le europitike parlamentistar, pe palikerel, kaj i terni generacija gejng o pobisteripe taj le tschatschipenge le lek bareder tschulipenge andi Europa ande pe bescharel.