2. august | Internacijonali Romengero gondolipeskero di Betschiste

O europitiko parlamento ando bersch 2015 o 2. august ojs internacijonali gondolipeskero di le Romenge taj Sintijenge, save ande NS-akero rajipe murdarde ule, aun prindschartscha. Andi Austrija ada barikano di dschi adi, kekaj butvar andar o redi le flogoskere grupnengere fartreterendar manglo ol, meg na ratificirim ulo.

On demand | Roma sam | 5.8.2019

Jek di sar sako avro o 2. august vodschikane manuschenge schoha na ovla. O nacis andi rat andar o 2. august upro 3. august 1944 murdaripe upro lejcti Roma taj Sinti ande Auschwitz Birkenau kerde. O gendo le flogoskere grupnengere dschenendar, save ande aja rat murdarde ule o viseschoftlertscha phenen, hot valami 4300 sina.

Gedenken am Ceija Stojka Platz
Yvonne Erdost

Betschiste o flogoskere grupnengere dschene den, kekaj na o tschatschipengero aunprindscharipe dim ulo, adale gondolipeske jek barikano than. I familija Stojka akarel use jek khetano gondolipe upro „Ceija Stojka Platz“ Betschiste Neubau ande. O akaripeskere alava i Gilda Nancy Horvath andar o farajn Lovara Roma Österreich likertscha.

Gedenken am Ceija Stojka Platz
Yvonne Erdost

O Hojda Stojka pra dajaha taj pra familijaha ande jek atschipeskero verda upre bartschino. Lake igen barikano sina, kaj lakero tschau i ischkola kher te rodel. Paloda pomoschintscha ov pra dajake o tepiche taj avre koji te biknel. Le Hojda Stojkaske jek aunpaschlaripe hi, ov schov tschavendar papu hi, kaj o terne i Romani tschib te siklon taj te vakeren. Leskeri familija i Romani tschib latsche vakeren, ov vaschoda igen loschano hi.

O „Ceija Stojka Platz“ ando 7. Betschitiko gemajndakero becirk del adale dijeske, savo uso simbol le bibastalipeskere keripestar upro desch esertscha manuscha, save ando dujto haburi murdarde ule, jek kheripe. I kinstlerkija taj cajtakeri ceugin la flogoskera grupnatar le Romendar i Ceija Stojka, savi 2013 muli, prikdschivtscha ojs tikni tschaj o tradipe, teldschumipe taj dukajipe duach o nacijonalsocijalistscha.

Jek telal o dschene uso gondolipe, upre jek pado beschto hi taj le dschenenca vakerel, o Hojda Stojka hi. Leskera dajake Ceija andar o muj dschindo lo hi. Khetan pra familijaha ov o 2. august schoha na ar mukla, adaj, upre ada than, savo pal leskeri daj Ceija Stojka akardo ulo. „Mein Chefin, mein alles“ phenel o Hojda Stojka dschidokle upro than o dschila la Lovarengera grupnatar „Amenza ketane“ te schunel sina.

Barikano schaj i Austrija hi, savi ojs erschti europitiko vilago le Romen ojs flogoskeri grupn aun prindschartscha, phenel i Marion Dworzack. Oj hi andar o farajn Voices of diversity, jek le farajnendar, save o ada berscheskero gondolipeskero mulatintschago upro „Ceija Stojka Platz“ upro pre terdschartscha.

Ande jek avri koja i Austrija la flogoskera grupnake le Romenge meg ada patschabe hi, o keripe jeke centrali gondolipeskere thanestar taj sikadipeskere centrumistar Betschiste, te le le gondolipeskere thanestar upro „Judenplatz“ faglajchintschal, asdel i Marion Dworzack ari.

Ceija Stojka Platz Wien | Gedenkfeier
Yvonne Erdost

So o loke phirdo gejipe la politikatar adala flogoskera grupnake aun dschal, hi ada jek barikano joma, savo ham meg dugo drom iste dschal, phenel i betschitiki dujto biro Birgit Hebein.

Gedenken am Ceija Stojka Platz
Yvonne Erdost

I Nuna Stojka, la Ceijakeri bori andar o kenvi pedar lakere bibastale terdschaviptscha, save oj ojs tikni tschaj ande Auschwitz Birkenau terdschivtscha, genel.

Afka o 2. august upro Ceija Stojka Platz mulatim ulo, mangipenca, palgondolipeha taj dschilenca taj jeka platformaha le tschatschipenge, soralipe, hajojipe, khetanlikeripe taj te le fadipeske.