Roma sam

Thaneskero kultarakero dipe le pisinascheske Stefan Horvath Erbatar

Sridon kiratiske ando Liszt-centro ande Raiding o kulturakere diptscha le thanestar Burgenland otscha dim ule. Patijarde ule ofto dschene, save barikane keriptscha kerde. Jek telende o Stefan Horvath Erbatar sina.

Roma sam | 1.7.2019

Ov pro dipe la thaneskera rotakera presidentkijatar Verena Dunst SPÖ uschtidija. I Dunst le thaneskere schero taj kulturakere thaneskere rot Hans Peter Doskozil fatretintscha. O diptscha sake trin berscha fadim on taj 3.600 eurojenca sakoneske dotirim hi.

Verleihung des Kulturpreises 2019 | Burgenland
DANIEL FENZ

O Stefan Horvath, o erschti Roma literaturakero uschtidaschi le austritike Pen Clubistar hi ov ando 12. novemberi 1949 andi phuri Roma sidlung Erbate upro them alo. Ov i „Hauptschule“ kisetintscha taj upro bau Betschiste buti te kerel gelo taj dschi uso betribeskero rot taj polier le schofintscha. Uso bombakero atentat ando feberi 1995 jek bibastalo pharipe le resla, jek leskere tschavendar murdardo ulo. Oda o kesdipe leskere literaturakere keripestar sina.

Arto projekto i cronologija leskere forostar hi

2003 ari alo leskeri kenva le anaveha „Ich war nicht in Ausschwitz“, kaj o Stefan Horvath pedar o terdschivipe le logerendar leskera dajatar taj leskere dadestar phukal; 2007 i kenva „Katzenstreu“, kaj ov andar o teror andar o 4. feberi 1995 andar mindenfelitike perspektivtscha phukal, 2008 khetan le muschikaschiha taj komponistiha Willi Spuller i schunipeskeri khelipeskeri CD „Katzenstreu“ kertscha, kaj o prindschardo schauschpileri Karl Markovics ojs vakeraschi use sina; 2013 leskeri kenva „Atsinganos“ ari ali, kaj ov pe le Erbakere Romengere sidlungenge vidminel.

Stefan Horvath
Peter Wagner

Ov kamla pe ando arto projekto la cronologijaha leskere forostar donde te bescharel.

„Me mindig jek mirno manusch somahi"

O Stefan Horvath ledschel i historija leskera dajatar taj dadestar, save but logertscha prik dschivde, taj odola phukajiptscha fejst likerel, save leske o Roma, save i NS cajt prik dschivde, phukade. „Saj dur o mule manca vakeren, me mro hango upre astava“, phenel o Stefan Horvath. Leskeri literatura but dipenca patijardi uli. 2016 uschtidija ov o „Theodor Kramer Preis“ le pisinipeske ando „Widerstand“ taj „Exil“.

„Me mindig jek mirno manusch somahi, sar mro dad, savo schov berscha ando logeri iste dschivlahi. Kher pedar ada na vakerdo ulo", phukal o Horvath, savo patijardo ulo.

Zeitzeugenprogramm Stefan Horvath
Karin Duschkin

Horvath ando cajtceugniskero programo hi

O Horvath te ando cajtceugniskero programo le austritike sikadipeskere ministerijumistar buti kerel taj ischkoli andi cili Austrija kherodel, kaj pedar pri persinlichi historija taj pedar i historija le Romendar andi Austrija phukal.