500 Roma taj Sinti uso kedveschno dad – rechtsekstremi protestscha ande Rom

O kedveschno dad Franziskus adi angloplane 500 Romen taj Sinten talalintscha. Uso molinipe andi Sala Regia ando apostolischi palasto, te o presidento la italitika bara raschajengera konferencatar, Gualtiero Bassetti, use sina. O talalinipe sina, kaj harno paloda ande Rom papal protestscha gejng o prikdipe socijali kherendar le Romengere-familijenge dija.

„Akan me vakerav!“, afka o kedveschno dad uso kesdipe leskere naphandle vakeripestar pal o molinipe ando Vatikan.

„Tschatscho hi: Polgartschen dujta klasatar del. Ham o tschatsche polgartscha la dujta klasatar odola hi, save le manuschen upri rik ispiden: Odola polgartscha la dujta klasatar hi, mint on na dschanen, sar valakas andi angali les. Le adjektiviha uso va, le avre ari tschiden, taj afka dschin, mindig la scheprujaha ando va, kaj le avren bejg schaj khosen, upre jek rik le diline vakeripeha taj upri avri rik le avre kojenca…. O tschtschikano drom ham o phralipe taj phenjipe hi.“

O khetanipe iste, upro patijavipe le manuschendar obocht del taj na avre bibastal koji te kerel, afka o gondo le kedveschne dadestar.

Imar o dujto di, idsch jek grupn dschenendar ando römischi avrutno becirk Casal Bruciato gejng o arkerdo la gemajndatar Rom, jeka 14-scherengera Roma-familijake jek socijali kher te del, protestirinde. I rechtsekstremi partaj CasaPound lengere dschenen use upre vrischtschande, anglo kher te demonstririnel, ande savo i Romengeri-familija dschil.

Birovkija Raggi gejng o rasismus bajder kejmpfinel

I römischi birovkija Virginia Raggi, savi sridon la familija kher rodija, lakeri solidariteta pal o rechtsekstremi protestscha ar te dschuminel, buteder dschenendar ladsch kerdi uli. I Raggi o tschatschipe la familijatar sorjartscha, ando kher ande te cidel. Oj le rasistischi hosinipeske na del pal, savo rechtsekstremi sorendar kerdo ol, afka i Raggi. Te avre prindscharde politikertscha la Romengera- familija kher rodine, pumari solidariteta te sikal.

Socijali khera tabu hi

Imar ando lejcti kurko ande Casal Bruciato taj ando avrutno becirk le forostar Roma, Torre Maura use protestsccha gejng Romengere-familiji alo, savenge i gemajnde socijali khera famitlintscha. Balutne partaji jeka demoha rejagirinde taj gejng o rasismus protestirinde.

I Raggi dikel, hot o ilegali Romengere-sidlungtscha ando foro tschuleder te on. Le familijenge socijali khera prik dim on.

Ando italitiko scheroskero foro ando lejcti juli jek camp buteder schel dschendendar le tschulipestar le Romendar upre putrim ulo. Pal o vakeripe le NGO-jendar maschkar 120.000 taj 180.000 Roma andi Italija dschin. Mindig use bibastale prik astariptscha gejng dschene le tschulipestar al.