OPRE ROMA! Baro mulatintschago uso 8to april ando ORFiskero RadijoKultur kher

OPRE ROMA! | Asden tumen Roma! na feder schaj o alav uso mulatintschago upro 8to april ol. But austritike Romengere farajntscha uso baro mulatintschago ando ORFiskero RadijoKultur kher pumaro soralo khetan likeripe sikan, loschanel pe o Harri Stojka, savo jek barikane use schunaschi use pro koncerto schaj akarel. O austritiko bundakero presidento Alexander van der Bellen.

„Adi o Internacijonali Romengero Di hi taj me kamahi jek cajchn te bescharel, hot on jek aun prindschardo, kamlo, respektirimo tschulipe andi Austrija hi. Taj mange igen latsche i muschika le Harri Stojkastar tecinel“, phenel o Van der Bellen.

Uso 30kero Internacijonali Romengero Di ando 8to april 2019 o farajn „Voice of Diversity“ jek baro programo ando ORFiskero RadijoKultur kher upro pre terdschartscha.

O gondo la barikana prindscharda diskusijakera karikatar, o koncerto le Harri Stojkaha taj le avre Romengere muschikakere bandendar, jek barikano resultato la latscha butjatar sikade.

„So me dschanav, erschtivar hi, hot jek bundakero presidento asaj schpecijeli Romengero mulatintschago sar lo adi hi, kher rodel taj vaschoda ada keripe jek barikano vert uschtidel“, loschanel pe o Harri Stojka taj o internacijonali barikanipe le Romengere Dijestar angle asdel.

„I lek ertschaveder forma le anticiganismusistar oja hi, hot o dschene amare tschulipestar vasch o khetanipeskero argranicalipe, pumaro telschtaminipe tagatinen vaj garun. Ada o lek bareder angle tschidipe hi, savo me gejng aja forma le anticiganismusistar schaj asdav“, phenel o Romani Rose ando keripe adala seletoskera formatar.

O dominirimo dscheno adala diskusijakera karikatar, savi anglo vodschikano dschivdo koncerto tel likerdi uli, o Romani Rose, anglebeschto le Centrali rotistar le nimtschke Sintijendar taj Romendar, sina. Upre ada patijardo di leskera flogoskera grupnatar o Rose o gondi andi karika otscha uso aunprindscharipe le kultureli butjendar taj upri schtotiskeri polgarengeri identiteta le tschulipestar, vodintscha. Tschoripe nan nisaj etnischi prindscharipeskero cajchn.

„Dschanen, ande jek tschatschipeskero schtot iste sake manusch o glajchi vert ol, oni aundikipe le dschenostar, sar lo ande amaro favosinipe terdschol: ‚Die Würde des Menschen ist unantastbar‘. Taj amaro tschulipe imar but schelberschengero ando europitike schtotscha dschil taj on pumare usediptscha pumare hajmatakere vilagenge kerde. Te ando gondo le patrijotismusistar. Te amen upro erschti themeskero haburi gondolintscham, kitschi dschene amare tschulipestar gejng i Francija terdschine upri nimtschki rik. Te ando dujto themeskero haburi, kitschi dschene amare tschulipestar uso nimci sina taj akor ando logertscha tel ispidim le ule, kaj on Sinti vaj Roma sina“, phenel o Romani Rose.

O filosofischi koji le moderatoristar, le prindscharde pisimaschistar Michael Köhlmeier, o aktujeli diskurstscha upre jek glajchi than le hajojipestar taj le esbe lipestar, asdine: „Raj Rose, me gondolinav, hot tumare dschene imar dureder andi Germanija hi, sar mri familija andi Austrija dschil. Man ham dschijakana meg niko na phutschla, te me imar integririm som, ham me gondolinav, hot tumara familijatar taj tumendar ada imar butvar phutschlo ulo“, adale alavenca o Köhlmeier i diskusija, pral.

Muschika te ada kirati schofintscha le, alava taj emocijontscha ande jek barikano hangoskero mangipe pal manuschanipe, te fojinel te mukel.

„Me gondolinav, hot o mulatintschago uso 8to april papal latsche upre lim ol Betschiste. Ando lejcti berscha mindig mulatintschage ando parlamento vaj ando gemajndakero kher dija. Ham asaj bare programoha sar adi, meg na. Ada khetanipe le farajnendar taj le NGOjendar, sa igen barikano taj barvalo kerel. O dschanipe ‚me na som korkore, hot me mange valaso kivaninav, me ham ledschijom ojav le gondendar le avrendar‘“, phenel i Marion Dworzack le farajnistar „Voice of Diversity“, savo ada mulatintschago kertscha.

„Servus, Szia, Zdravo, Del tuha“ | 14. April | 13:05 Uhr | ORF2 Burgenland