Ferry Janoska | Neve hangi le Django Reinhardtistar

O burgenlanditiko baro kinstleri Ferry Janoska taha 60 berscha phurano ol. Vaschoda jek vakeripe leha kerdo ulo pedar leskeri nevi produktcija „Zvuk Panonije“, savi harnon erscht ari ali. Horvacke flogoskere koji upri nevi koja , telal nevo keripe le Django Reinhardtistar kerdo ulo.

On demand | Roma sam | 21.1.2019

Harnon palo upre dipe la burgenlanditika thaneskera regirungatar o kinstleri imar dschantscha, hot ada jek produktcija iste ol, savi jek bulhe publikum aun vakerel. O Janoska probalinel le flogoskere grupn pumara muschikaha afka khetan te phandel taj te pre instrumentiha „Bandoneon“ jek falato la multikultureli bandatar lo hi. Uso dschene genen o Trio Schneeberger, sar i dschilaschkiji Julia Hamedinger taj o Tome Janković. Dschilado ol andi nimtschki taj horvacki tschib.

O dschilaschi Tome Janković ando bersch 1978 andi Bratislava upro them alo, kaj te o muschikakero konservatorijum kher rodija. Ov te ojs tontechnikeri taj producento buti kerel. Ov usi A-capella dschilaschkijakeri grupn „Basbaritenori“ use hi. I Julia Hamediner ojs redakteurkija ando thaneskere schtudijo ORF-Burgenland buti kerel. Ada nan i erschti horvacki muschikani produktcija, on imar ando bersch 2016 khetan le Karl Kanitschiha i CD „Cer Danas Svenek - Gestern-Immer-Heute“ ari ande.

Use leskere komposicijontscha le Janoska mindig barikane gondi use hi. Upro vodschi leske paschlol use ada projekto o anav „Oj Jelena“, „Da nije Ijubavi (miks)“ taj Gradišće okolo Pinke“. „Gradišće okolo Pinke“ jek schukar flogoskeri koja hi, kaj o muschikaschi jek ajgeni „Bandoneonsolo“ komponirintscha. Use „Oj Jelena“, jek prindschardi komposicija, kaj o Josef Hayden leskere finaliske „Symphony No 104“ upre butschalim ulo, o Janoska ham na jek klasischi use gejipe arodija, leske i muschika „Gipsy Swings use phentscha. „Da nije Ijubavi (miks)“ jek medley hi, savi o mindenfelitiko la produktcijatar „Zvuk Panonije“ papal del: Andar melancholija dschi uso barikane hangi ando keripe le Django Reinhardtistar.