Jek barikani akcijona la ORF Roma redakcijatar andi Slovakija

Usi aktujeli sendung „Roma sam“ schukar akarel tumen i Susanne Horvath. I ORF flogoskeri grupnengeri redakcija use jek pomoschagoskeri akcijona tumenca phirel. Amari ORF Romengeri flogoskeri grupnengeri redakcija butvar andi Slovakija uso Roma ladel, lenge khereskere koji vaj tschavengere khelipeskere koji, kereki, save lenge pekamle on, te anel.

On demand | Roma sam | 14.1.2019

Valami 300 manuscha odoj upri rik le forostar „Nitra“ dschin. O khera odoj angle poar berscha kerde ule. Angarenca fitim ol, ojs „palikeripe“ le familijenge, save mindig o schtrom potschinen, del le komunalcentrumistar te jek thojipeskeri maschina, vaj schtaubsaugeri gratis.

O foro „Nitra“ valami 40 minutscha le thaneskere forostar Bratislava bejg hi. I tablina jeka verdakera busakera linijatar, savakeri numera le avrutne dschenendar na prindshardi hi, sikal i endschtacijona. Pali endschtacijona i sidlung al „Orechov dvor | andi nimtschki tschib „der Nussgarten", kaj ando bersch 2004 manuscha andar o foro Nitra aunsidlim ule.

Agun sina 60% gadsche taj 40% Roma, save odoj iste pumen tel mukle, phukal o Martin Paschka, schero le adi odoj tel mukle komunalcentrumistar. On na dschanahi pumare mitscha te potschinel, vaj ojs socijali manuscha len becajchninahi, save pumen phare aun pasinahi le khetanipeske.

Le but khelipeskere kojenca te ando ORF bus but kada, botschkori, tschavengere vodri, petschi, compjutertscha, vaj schtaubsugertscha hi.

O Martin Paschka loschanel pe pedar i koperacija maschkar i ORF flogoskeri grupnengeri redakcija taj i sidlung. On pumen igen upro kereki loschande, mint on dschanen, on len uschtiden te mindig andi ischkola phiren“, phenel o Paschka.

Sajt poar berscha terdschon andi sidlung containerengere khera. Jek ischkola hi, savi ojs anglutni ischkolakeri klas vodim ol. Adaj o tschave upri ischkolakeri cajt kisetim on, le fokusiha upri siklipe la sako divesakera hygijenatar.

Pharo hi, phukal o komunal butjaschi, le dajen taj daden te motivirinel, ratschaske upre te uschtel, kaj pumare tschaven schaj andi ischkola bitschan. Afka ov taj o avre butjaschtscha mindig metodscha iste laken, kaj o intersi le tschavendar mindig upre likerdo te ol.

Palo tel lodinipe o Martin Paška phukal, ov taj pre butjaschtscha pantsch var ando kurko ande Orechov dvor, le manuschenge odoj pomoschinel, kaj lenge pekamlo ol. „Amen pomoschinas lenge buti te lakel, beverbungakere lila te pisinel, amen lenge tschavengere verdi ketschen las, te on le tschavenca uso badari iste dschan, vaj muguli pascheder badari lakas. Amen pomoschinas, kaj dschal taj patschan mange, na del nisaj di, kaj schaj nugodinas“, phenel o Paschka.

Pantsch tschave mer amende hi taj khelen pumen. On naschtig andi ischkola phiren. Jek lendar nasvalo hi, jekeske o pro dukal. On taj lengere familiji iste, te on ando foro usi flogoskeri- vaj maschkarutni ischkloa, vaj andi buti, vaj uso badari kamna, valami 20 minutscha pedar mesujakere droma iste phiren, kaj o busakero upre likeripeskero hi. „Adaj mindig valami trin grad schudreder hi sar ando foro“, phenel o socijalakero butjaschi.

O drom pal uso terdschavipskero than le busistar tschikalo taj jegoschno hi. Pherde nojoha, upro mesuji verdakere padi taj kereki. Ando trin masek amari redakcija le ORF-istar papal ando verda pe bescharla taj papal kojenca, save o vodschikane manuscha andar i Austrija otscha dena, la sidlungake upri rik le forostar Nitra le dschenenge anla.

Tumenge i Yvonne Erdost ada barikano phukajipe kertscha.