„Glücksmacher – E baxt romani“ resen „Steine am Weg“

Ando 7.12 ando kher le „Volkskulturenendar“ andi Uprutni Schica duj kenvakere presentaciji sina, savo la flogoskera utscha ischkolatar le burgenlanditike Romendar organisirim ulo. Andral gendo ulo le Samuel Mágójistar khetan pre phraleha Karóly andar lengero verk "Glücksmacher – E baxt romani“, taj o avro sina o Gerald Kurdoglu Nitsche pre tekstiskere khetankedipeha „Steine am Weg“.

On demand | Roma sam | 10.12.2018

Ov pe andi pri kenva donde bescharel la literaturaha le ladaschenca andi Europa.

Inspirirt ulo ov ande pri ajgeni dschivipeskeri historija, phenel o Nitsche.

Jek barikano becug le betschitike pisinaschi hi uso Roma taj Sinti - vaschoda te tekstscha la flogoskera grupnatar, sar le Stefan Horvathistar, ande „Steine am Weg“ ande hi.

Jek barikani pajtaschkija le Nitschejistar sina i pisinasckija taj kinstlerkija Ceija Stojka, savi imar muli. Ov phukal talalinipendar laha, save le preginde.

O Samuel Mágó taj leskero phral Karóly pumari kenva "Glücksmacher – E baxt romani“ imar ando bersch 2017 ardine. Odotar aun barikane geniptscha len sina taj o use schunaschtscha loschande pumen, Roma taj te o gadsche.

Ande 13 tekstscha phukan o phrala i historija lengera familijatar sar terdschaviptscha andar o vilago le Romendar taj ada sa andi nimtschki taj Romani tschib.

O Mágó na tschak pisimaschi hi, ov te aktivisto hi taj ando ternengere koji la flogoskera grupnatar. Te ov usi EU-konferenca usi tema „Antiziganismus“ Betschiste ando Vienna Austria Center ando ar le novemberistar use sina taj latschi arajipe andral cidel. I diskriminacija le Romendar taj Sintijendar andi Austrija meg mindig aktujeli tema hi, adaj meg ande but koji ar butschalim iste on, phenel o Mágó.