Lovara Willy Horvath pedar o Stojka, Berger, Sarközi

Ando gaveskero museum ande Mönchhof lejcti paraschtuja o mulatintschago „Apropos Roma – prik o Roma – betschitike Romengere familiji“ sina. O betschitiko Lovara Willy Horvath pedar prindscharde Romengere-familiji phukal, afka sar o Stojka, Horvath, Sarközi, Berger taj Nikolić-Lakatos.

Ando vakeripe phukal ov pedar o familijakere koji maschkar prindscharde protagonistscha taj lengere historiji, kesdim pra familijaha, la familijaha Horvath taj la familijaha Stojka.

I lek barikaneder fatreterkija la familijatar Nikolić-Lakatos hi i dschilaschkija Rusza Nikolić-Lakatos vaj sar la o Willy Horvath akarel, i muam Rusza. Lake te te palikerel hi, kaj i muschika le Lovarajendar ojs UNESCO themeskero patijaripe aun prindschardo ulo.

On demand | Roma sam | 29.10.2018

Jek avro, but schundo anav, Berger hi. Odola ham na kerinen uso Lovara. O Horvath ande ada khetan hejnginipe o pharipe la tschibtschatar maschkar o mindenfelitike Romengere-grupn vasch o mindenfelitike, pal leskero schecinipe, 27 dijalekti, phukal.

Imar mindig jek khetanipe maschkar o Burgenland-Roma taj o betschitike Romengere-familiji delahi, anava sar Horvath, Sarközi, Stojka, save adaj taj te odoj delahi, sikan le. Jek bibastalo khetanipe, hi o tradipe taj o murdaripe ando nacijonalsocijalismus. Tschak tschule Lovara taj Burgenland-Roma o dujto themeskero haburi prik dschivde.

O Willy Horvath i cukunft andi terni generacija le Romendar, savi adi meg feder ar siklim taj internacijonali fanecim hi, dikel. Duj dschene adaj igen barikane angle te asdel kamala, la reporterkija taj aktivistkija Gilda Horvath taj le pisimaschi taj aktivisto Samuel Mago.

Tip

Podijumakeri diskusija | „Diversiteta andi Europitiki Unijona – O probalinipeskero peripe Roma andi Europa“

Kaj la Austrija o rotengero presidentakero khetanipe hi, o mulatintschago le Romano Centrostar khetan la organisacijaha ERGO Network taj le khereha la Europitika Unijonatar ande Betschi, organisim ol.

Tschetertekon, 8to novemberi 2018, 18.30 orenge, ando kher la Europitika Unijonatar, Wipplinger poschtito 35, 1010 Betschi.