Ruža Nikolić-Lakatos | Lovarica, dschilaschkija taj botschofterkija lakere flogostar

La Lovaricjake Ruža Nikolić-Lakatos te palikerel hi, kaj o dschila le Lovarendar le UNESCO ojs „Weltkulturerbe“ aunprindschardo ulo. Ada sina ando novemberi 2011, kada i Ruža o lil ando betschitiko tradicijakero kafe Weimar prik lija. I adivesakeri sendung Roma sam la barikana dschuvlake vidmim ol.

On demand | Roma sam | 20.8.2018

O dschivipe la Lovaricjatar Ruža Nikolić-Lakatos 1945 kesdintscha taj odo mindschart tradipeha, logerijha taj murdaripeha konfrontirim sina, oj ham prik dschivtscha taj Pápate, ande jek tikno gav pasche Győr (Ungriko) upre bartschini. Kada i Ruža deschujek berscha phurani sina, uso „Ungarn-Aufstand 1956“ alo taj oj palgondolinel:

"Angloda le cile murschen, save Roma sina o harengere pumenca line, kaj on uso „Aufstand" use sina. Amen gondolintscham, hot o cile kartschi dim on. Mro dad gondolintscha, hot murdaren amen, sar andi hitleriskeri cajt, taj afka pedar i granica gejam andi Austrija. Amen politischi naschikeraschtscha samahi, taj ojs asave aunprindscharde ujam. (...) Kada pedar i granica pejam, pedar oda tschak ada dschanav, hot o nipo igen vodschikan sina, on te hal taj rontschi amen dine. Paloda ande jek logeri pejam le naschikeraschtschenge ande Wörgl (Tirol). O cile pomoschinahi. (...) Afka amen andar Wörgl papal pal ajam, taj i muam Betschiste amen upre lija, ando 21. becirk.“ Jek schajipe amen sina upro Ringelseeplatz jek verda le atschipeske te mitinel. Odoj but ungrike, ham te Roma andar i Austrija atschnahi. Odoj mre Rom le Mišo Nikolić te prindscharel siklijom.

I Ruža ande jek tradicijoneli Romengeri familija upre bartschini. I mindenfelitiki kultura, i phukajipeskeri kultura taj i barikani muschika taj khelipe o sakodiveskero dschivipe lendar sina. La Ružakero dad le cile ternen sake thanendar pre phukajipeha aun cidlahi. O cile muschikan la familijatar sina. La Ruža taj lakere phral Fasoš igen baro talento sina.

Jek irinipeskero punkto ande lakero dschivipe sina jek talalinipe la muschikana etnologijatar Ursula Hemetek. Oj le Mozes Heinschinkistar imar la barikana dschilaschkijatar but schuntscha taj kamlahi la prik te vakerel, use jek pradipeskero mulatintschago use te ol taj duj tradicijoneli dschila te dschilal. I Ruža na phentscha, oj ham pre murscheha taj pre tschavenca upro koncerto ali. O Mišo Nikolić ande pri kenva „Landfahrer“ phukal, hot i Ruža use ada koncerto jek dschili dschilatscha. „Kada i dschili ar sina, o dschene odoj igen loschane sina taj vrischdschanahi, hot meg buteder latar te schunel kamna. (...) Usar oda di aun le gadschenge te dschilal taj te khelel kesdintscham,“ phukal o Mišo Nikolić.

Khetan pre tschavenca Mischa taj Sascha on la banda „Ruža Nikolić-Lakatos and The Gypsy Family“ kerde, taj i Ruža i lek barikaneder dschilaschkija le thanestar uli. On sa use kerde, kaj o Lovarengere dschila upre likerde taj schoha na pobistede te on. „Afka mri Romni Ruža ojs botschofterkija lakere flogostar uli. Lakere hangoha oj le dschenen loschanel, oj vodschikane barikane Lovarengere dschila le use schunaschenge schejnkinel“, phukal lakero Rom ande pri kenva „Landfahrer“ Mišo Nikolić.

Duach i sendung vodinel tumen i Susanne Horvath.