Ferry Janoska | leskere muschika ojs phandlipe le burgenlanditike kulturendar

Ferry Janoska ando aguno tschechitiko upro them alo, adi ande Neusiedl am See dschil taj le burgenlanditike kulturakere dschivipestar na buter bejg te gondolinel hi. I sendung Roma sam vidminel pe ande duj sendungentscha adale barikane manuscheha.

I muschika mindig upre leskero dschivipeskero drom le vodinel. Leskero dad Ferry Janoska, te ov barikano hegedujaschi hi, leha imar igen frija la muschikaha kesdintscha. Katar ov al taj ko lo hi schoha tema sina, na andi familija taj ande leskero dschivipe.

1972 barikano leske sina. Leskero dad o Ferry Janoska pra familija kamla i rejalsocijalistischi reschim Tschechoslovakija pal peste te mukel. Jek tromali joma, savo la familija Janoska ande jek nevo dschivipe andi Austrija antscha. O pajtaschtschago, savo leskera famlijijake ando ulo, le Ferry dschi adi igen vodschikan loschanel.

Imar frija dschantscha, hot ov komponisto kamla te ol, oda imar schov berschenca sina, kada ov jek koncerto dikla. Odotar aun but berscha ov pre dadeha muschikaha kerlahi, savo ov schoha na pobisterla. 27 berschenca „Tonsatz“ ando konservatorijum Betschiste schtudirintscha.

O Ferry Janoska vasch leskero barikano keripe o „Theodor Kery Preis“ taj 2013 o baro patjaripeskero cajchn le burgenlandistar uschtidija. Ando lejcti berscha but ojs komponisto butschalintscha sar le Wiener Philharmoniker, Wiener Sängerknaben, Reinhard Fendrich, taj le barikane reschiseriha Peter Wagner. Projektscha use sina, save leske o tschatscho drom sikade, phenel o Janoska andi sendung Roma sam.

Angle poar berscha o Ferry Janoska jeke instrumentiha jek nevo kesdipe kesdintscha. Jek armangipe, mint o arodimo instrumento „Bandoneon“ jek komplicirti instrumento hi taj na loke te cidel hi. Ov ham majsterintscha le taj imar barikane kinstlerenca sar le Wiener Philharmonikerenca taj le Paul Guldaha cidija.

Ov pra butjake meg mindig palal dschal. Akan jek nevi produktcija kerel, kaj o horvacke flogoskere dschila nevi interpretacija uschtiden. Jek „Crossover-Projekt“ maschkar o horvacko flogoskere koji, „Gypsy Swing“ taj „Jazz“ elementscha.

O Ferry Janoska, save pe na ande jek ladlina te dschuminel mukel, kekaj vascho barikanipe so ov restscha ov upri phuv atschino taj na pobisterel katar lo al taj ko lo hi.

Duach i sendung vodinel tumen i Susanne Horvath, kerdo ulo lo la Katharina Janoskatar.