„O hojamo Buddha“ Erbate

Na dur o dokumentariskero film ando nimtschki tschib „Der zornige Buddha“ le Stefan Ludwigistar, pedar o János Orsós kerdo budistischi gimnasijum le Romane ternenge ando ungriko Sajókaza, le ternenge Erbate sikado ulo. O reschiseri Stefan Ludwig phukal Roma samiske pedar pro film, savo igen latscho o dschivipe le Romendar sikal.

On demand | Roma sam | 5.6.2017

O film phukal pedar i historija schtar ternendar, save pumari matura upri budistischi ischkola le János Orsósistar te kerel kamnahi. I dokumentacija vodinel len upre lengero drom taj dschivipe andi Roma sidlung.

Ando kesdipe o dschene andi Roma sidlung ande Sajókaza leskere teamiske na trauninahi, phukal o Ludwig. Ham duach o buteder prindscharipe, lek feder duach o asajipeskere keriptscha, o patschanipe jerintscha.

O Stefan Ludwig ande pro film probalinel jek avro dikipe upro Roma te tschidel taj o dschivipe afka te sikal sar lo tschatschikan hi, oni le tetertschen oni le opfertschen te dokumentirinel. Ov phenel, hot ando Ungriko iste pe but irinel, kaj o Roma taj o gadsche feder khetan schaj dschin.

Ando vakeripe la Katharina Janoskaha phukal o reschiseri na but pedar o ardschajipe le filmistar. O fakto hi, hot na o cile le ternendar i matura kisetinde taj odola probalinen avrutnon la Roma sidlungatar pumaro dschivipe upre te bauninel.

Ando Ungriko o film butvar sikado ulo, but organisaciji pumen ande bescharde, kaj lo sikado te ol, phenel o Ludwig. O rejakciji igen latsche sina, te andi Austrija. Ham uso sikajipe andi Austrija Erbate, Roma na use sina, o Stefan Ludwig brigaschne use phenel.

Vakeripe taj temakero upre butschalinipe: Katharina Janoska

Duach i sendung vodinel tumen i Susanne Horvath