Lex CEU | Protestscha gejng o use tschapinipe la Soros universitetatar

George Soros sina ando lejcti masektscha butvar uso fajndiskero kipo la Orbán regirungatar. Tschatschiptscha la „Soros universitetatar | CEU“, sar o premije ministeri Orbán butvar phenel, duach i tschatschipeskeri novela sorale tel dschumim ol. Schaj hot i utschi ischkola bojd use tschapinel.

On demand | Roma sam | 22.5.2017

"O ungriko sikadipeskero ministerijum ando ar le berschestar 2016 jek prüfinipe ando Ungriko le cile 28 avrethemeskere universitetendar kertscha, kaj ando 27 ari alo, hot aunprindscharipe ande lengero vilago falinel. Uso cile universitetscha imar akan korekturtscha kerde on.

O angle tschidipe hi: O tschatschipeskero parujipe ,godschikano cil‘ hi, taj tschak gejng i CEU (Anm. Central European University, savi le George Sorosistar kerdo ulo, dschal. Tschak adala universteta o privilego hi, vasch jek jekoschno sikadipeskero programo jek ungriko taj jek amerikanitiko diploma ari te del(ada andi Austrija na tromal kerdo te ol.)"

Afka butschol o oficijeli phenipe la ungrika botschoftatar Betschiste, telal o anav „Informacija taj parujipe le tschatschipestar pedar o utsche ischkoli ando Ungriko“.

But protestscha

Uso protestscha ande Budapest but ternendar na dschal adi na buter pedar i Central European University. Buteder pedar oda dschal, te i Orban regirung jek latschi politik kerel, te schaj akceptirim ol, hot on agresiv hi taj so andi sikadipeskeri politik kerdo ol. Te i Central European University use tschapim ol vaj na, adaj nischta ar kerel, phenel o ungriko politologe Áron Varga.

Tschatschipeskeri novela schaj i „Ära“ kisetinel

I CEU pomoschinel imar but berscha dschenenge andar o tschulipe le Romendar. Pasche o schtipendijen, save Romengere schtudentscha uschtiden, del te jek Roma fakulteta, ande save o schtudentscha pedar i Roma identiteta taj o Romengero micinipe sikade on.

Jek le profesorendar o Iulius Rostas hi. Ov rumenitiko Roma hi taj anglebeschto la abtajlungatar le „Romani Studies“ andi CEU.

I tschatschipeskeri novela la ungrika regirungatar schaj te ande leskeri buti ande astarel, phenel lo ando vakeripe Roma samiske.

O aktujeli flogoskero grupnengero magacin adale temaha donde pe bescharel taj mukel le resten taj visenschoftleren use te vakerel. Jek keripe le Samuel Magojistar andar Budapest.