Roma Pen Club literaturakero dipe la Rosa Gitta Martlake

Ando 10. april, duj divesa palo mulatintschago le Internacijonali dijestar, fadija o Pen Club Österreich o „Roma-Literaturpreis“ uso gondolipe la Ceija Stojkatar.

I pisinaschkija Rosa Gitta Martl uschtidija o dipe ande jek barikano mulatintschago ando „Presseclub Concordia“ Betschiste. Lakere verkenca „Uns hat es nicht geben sollen. I Rosa Winter, Gitta taj Nicole Martl. Trin Sinti generaciji dschuvlendar phukan taj „Bleib stark, Atsch sorale“, arbutschalinenel i Sintica i Martl pri familijakeri historija taj aun pe phandel pra phukajipakera tradicijaha la Ceija Stojkake. I Gitta Martl afka le upre butschalinipeske la historijatar papal jek falato use kerel.

O „Roma-Literaturpreis“ ada bersch o tritovar otscha dim ulo. I Rosa Gitta Martl palo Stefan Horvath taj Samuel Mago i erschti dschuvli hi, savi o dipe uschtidija. I pisinaschkija te keraschkija le Linzer farajnistar Ketani le Romenge taj Sintijenge sina. Kekaj li patijardi uli, oj i aktujeli situacija kritisch dikel taj paraleltscha usi schitikni historija la Austrijatar cidel - ando ardipe la aktujeli kenvatar „Bleib stark“.

O „Roma-Literaturpreis“ le PEN Clubistar dikel pe ojs cajchn gejng o rasismus taj diskriminacija ham te ojs jek koja le mahnmalistar le opferenge le Romendar taj Sintijendar ando nacijonalsocijalismus. Palo haburi dija but dschene la flogoskera grupnatar, save na ojs opfertscha aunprindscharde sina.

Andar i Germanija o Daniel Strauß, dscheno andar o „Zentralrat Deutscher Sinti“ taj Roma odoj sina. Ov ande pro vakeripe argranicalinipestar, odola generacijatar, save o holocaust prik dschivde, vakertscha. Jek trauma, savo le Romen taj Sintijen dschi adi meg tradel. Vaschoda igen barikano aja solidariteta taj khetanlikeripe andrutnon la flogoskera grupnatar hi, sar o Strauß lenge phenel „Romanes vakerde manuscha“, te sorarel taj aun te tradel. O Roma taj Sinti mindenfelitike droma lakle, kaj pedar ada trauma schaj vakeren taj pumen schaj ar dschuminen, la muschikaha taj literaturaha.

Ande lakero vodschikano genipe, savo te la pisinaschkijake Martl use gelo, gentscha i pisinaschkija andar pri nevi kenva „Bleib stark“. I Rosa Gitta Martl upre butschalinel, aun prangerinel taj pedar i bibastali historija pra familijatar phukal, savi le use schunaschenge dukipe taj vodschikanipe prik del. Ando tekstiskero ardipe „Brief an meinen Großvater“ ada igen soralo esbe te lel hi. I Katharina Janoska o OT Martl 2 genipe tumenge kisetintscha.

„Forum4Burgenland"

Ando 11. april 2019 upri Pedagogischi Utschi Ischkola Burgenland jek nevo forum, „Forum4Burgenland", uso burgenlanditike flogoskere grupnengere tschibtscha kerdo ulo. O sikadipeskero forum hi o arajipe jeka khetana inicijativatar la PH Burgenland, la sikadipeskera direktcijonatar taj le burgenlanditike flogoskere grupnendar, o Ungrike, Roma sar o burgenlanditike Horvacke. O Emmerich Gärtner-Horvath uso sikadipeskero forum le Romenge use sina.

Buteder use aja tema schunen tumen andi adivesakero flogoskero grupnengero magacin Roma sam la Susanne Horvathaha.

Roma-Literaturpreis des Österreichischen PEN an Rosa Gitta Martl
Bedeutsamer Moment an der PH Burgenland