Ruža Nikolić-Lakatos | O cilo ileto dur tradiciji taj pal dschumipe

I Ruža Nikolić-Lakatos, botschofterkija le Lovarendar lakera flogoskera grupnatar, mindig kamlahi, kaj i dschilavipeskeri tradicija la terna generacijake bajder dim te ol. Dschi usi rejalisirung lakere cilistar but tikne kojendar taj dukatar vodim li uli.

!!! Roma sam | 27.8.2018 | 20:50 orenge | Radijo Burgenland livestream !!!

I familija Lakatos ande jek tikno kher ande jek Roma-sidlung ando Ungriko Pápa dschivlahi. Upro but fori mer Pápa kinahi taj biknelahi lakero dad taj batschi grasta. On igen tschorikan dschivnahi. Ando tikno kher, kaj la Ružakeri tschavebgeri cajt sina, na but than la familjake delahi.

O muschikano talento la Ružatar lakere dadeske imar upre pelo, ham oj na tromlahi ando pradipe te dschilal. Te dschilal hi ando maschkarutno punkto te terdschol taj barikanipe upre tute te cidel. Aja pativ hi taj na sakoneske use terdschol. Jek dschuvli, savi o entschajdinipe peske resel, jek „Tabu"iskero phagipe kerel.

Kada i Ruža deschujek berscha phurani sina, uso "Ungarn-Aufstand“ alo. Sar but esertscha avre te i familija Lakatos andi Austrija prik gele, kada o granici harne prade sina.

I familija Lakatos ando logeri Tirol peli taj paloda upro Ringelsseplatz Betschiste Floridsdorf ande jek ladipeskero kher cidine. I Ruža Lakatos pre mursch Mišo Nikolić te prindscharel siklija. Oj khamni uli, ham o Mišo iste andi Jugoslavioja pal gelo, kaj le na upre likeripeskero lil nana.

Andi tradicija le Lovarendar o khamnipe la Ružatar bari ladsch la cila familijake hi. Meg te oda use perel, kaj i familja na kamel, hot o duj te soharen. Lakero mursch Mišo Nikolić andi Jugoslavija uso nimci iste gelo taj na buter pal le mukle. Ov le ham schofintscha, pedar i granica andi Italija naschi te dschal. Pedar i Francija taj Belgija andi Germanija alo, kaj lo ande jek naschipaschengero logeri upre lim ulo. Paloda oj pre schov berschengere tschaveha use pro Rom cidija.

I terni familija Nikolić-Lakatos ojs erschti andi Germanija atschine taj use jek grupn Kalderaschendar atschnahi, save ojs tepichiskere biknaschtscha buti kernahi. Kada la Ruža taj lakere mursch eklik loj sina, on andi Austrija gele taj odoj jek kher mer Betsch kinde. Upre pradime koncertscha, angle gadsche, oj agun na gondolinlahi.

Muguli o meripe lakere tschauistar Sascha ando bersch 2004 taj o mulipe lakere Romestar Mišo ando bersch 2007 na lakero kamipe la muschikake phagla. Pal jek harno nugodinipe ando bersch 2010 butschalinlahi i Ruža Nikolić-Lakatos neve dschenenca andi banda. La lovaricake Ruža Nikolić-Lakatos te palikerel hi, kaj o dschila le Lovarendar ojs „UNESCO Weltkulturerbe“ aun prindschardo ulo. Ada sina ando novemberi 2011, kada i Ruža o lil ando tradicijakero cafe Weimar prik lija.

Ruža Nikolić-Lakatos | Lovarica, Sängerin und Botschafterin ihres Volkes

Ruža Nikolić-Lakatos | Lovarica, dschilaschkija taj botschofterkija lakere flogostar