Kalyi Jag but micinel taj sikal

I muschika taj i kultura le Gusztav Vargajiske igen barikano hi. Oj o drom usi inklusijona taj sikadipe kerel. Leskere sikadipeskere programiha pomoschinel ov terne manuschenge andar leskeri flogoskeri grupn soralipe len te del, kaj pumari tradicija te schecinen taj bajder te den. Pedar ada o Varga andi aktujeli flogoskeri grunakeri sendung Roma sam phukal.

On demand | Roma sam | 13.8.2018

1978 sina, kada o Gusztav Varga poar muschikaschenca kesdintscha odola dschila, savenca ov ande pri familija upre bartschino, ando cile vilagi te cidel. Afka o keraschi Varga barikane phukal, hot on o erschti sina, save andi Romani tschib dschilavnahi. La bandake ov o anav „Kalyi Jag“ dija. Internacijonali patijariptscha taj cidiptscha ande but mindenfelitike vilagi paloda ale. Ande juni sina o Gusztav Varga pra bandaha Kalyi Jag upro Roma Butschu ando Burgenland, sar ando Joseph Haydn-Saal la universitetatar la muschikake taj kunstake Betschiste.

Andi aktujeli sendung Roma sam schunen tumen jek vakeripe le Gusztav Vargaha, savo o schero la bandatar Kalyi Jag hi. Ov peske upre dija, pra muschikaha buteder te kerel, sar leskere „Fans“ save pumare prenca use leskeri barikani muschika khelen.

I muschika andi sendung adi la Kalyi Jagatar andar o koncerto Betschiste schunen.