„E BISTARDE | Vergiss mein nicht“
On demand | Roma sam | 4.6.2018
O festivalo, savo andar o 14. dschi 17. juni dschal, bescharel pe te le 80. berschengere dijestar le aunphandlipestar la Austrijatar uso „Nazi-Deutschland 1938“ donde. O than le Romendar ande Floridsdorf (Betsch), pasche mero Ringelseeplatz, dininel ojs festivalakero than. O Ringelseeplatz ando 1960-iger berscha jek talalinipeskero than le Romendar, Sintijendar Lovarendar taj le Jenischijendar sina. Adi jek schpurtiskero than odoj hi.
Servet Yilmaz | Romano Svato
Festivalo ojs temporeri gondolipeskero than
O ledschaschi le festivalostar „E BISTARDE | Vergiss mein nicht“ hi o Romengeri teateriskero farajn Romano Sveto. O farajniskere keraschtscha sina o phenja Simonida taj i Sandra Selimovic. On le temenca „Anti-Romaismus“, rasismus taj seksismus donde pumen bescharen. Odoj o phenja Selimovic uso festivalo upre sikan, upro falindo gondolipeskero than le Romenge taj Sintijenge Betschiste. „Ada festivalo hajol pe uso jek ojs temporeri gondolipeskero than taj use jek joma upro drom jeke gondolipeskere thanestar“, pisinen on uso lengero presejakero ardipe.
„Roma Armee“ jek barikanipe
I Simonida taj i Sandra Selimovic ojs tschave pumara familijaha andar i Serbija andi Austrija ale. On ojs schauschpilertscha anav pumenge kerde. On jek teateriskero khelipe use ada festivalo kerde. „Roma Armee“ le Maxim Gorki teateistar Berlin terdschol ojs barikanipe upro festivalakero programo. Kheldo ol „Roma Armee“ ando 16. dschi 17. juni, mindig 19:30 orenge, ando Wiener Volkstheater.
Romano Svato
I Roma Armee internacijonali hi, feministisch, upre terdschojipeskere. O schauschpilerkiji/tscha Romnja hi, Rom andar i Austrija, Serbija, Germanija andar o Kosovo, Rumenija, Bari Britanija taj Svedija, on te hi israelisch-nimtschke-turkitike-Berlinertscha gadsche.
Festivalakero kesdipe 14.6.2018, 14:00 orenge
O festivalo „E BISTARDE | Vergiss mein nicht“ ando 14. juni, tschetertekon, 14.00 orenge, upro Romaplatz, te o becirkiskero angleterdschardo Georg Papai use hi, savo o festivalo pral. O koncerto la betschitika grupnatar Pilerovi 16.00 orenge kesdinel. Uso erschti festivalakero di, 19.00 orenge, genel o Samuel Mago andar i kenva „E Baxt Romani“ muschikane vodinipeaha. Paloda le barikane Diknu Schneebergerha jek koncerto del.
Romano Svato
Gondolipeskeri tablina upro Ringelseeplatz upri terdschardi ol
15. juni, paraschtuja jek historischi di hi. Jek gondolipeskeri tablina upro Ringelsseplatz ando betschitiko Floridsdorf khetan le becirkiskere angleterdschavipeha Georg Papai upre terdschardo ol.
Suboton, , 16. juni, schaj tumen 12.00 orenge
jek historischi vodinipe duach o becirk Floridsdorf keren. Kiratiske akor o koncerto la brass bandatar Bojan Ristic del, 16.30 orenge upro Romengero than.
Kurkeste kesdinel o programo jeke gondolipeskere mulatintschagoha. 12.00 - 13.00 orenge, i gondolipeskeri mischa andi Romani taj nimtschki tschib le opferenge andar i NS-akeri cajt tel likerdi ol.
Paloda 13.30 orenge o tel utscharipe la gondolipeskera tablinatar angle lim ol. Le koncertiha Mosa Sisic 17.00 orenge o festivalo „E BISTARDE | Vergiss mein nicht“ kisetim ol.