Sarközi taj Klippl pedar 25 berscha flogoskeri grupn le Romendar

O kulturakero farajn le austritike Romendar 1991 le Rudolf Sarközistar Betschiste kerdo ulo. Ada sina o aundradipeskero kereko le aunprindscharipeske le Romendar ojs flogoskeri grupn. Leskero tschau Andreas Sarközi meg mindig ando farajn buti kerel. Ov pal gondolinel upro kesdipe le farajnistar taj i cajt anglo aunprindscharipe le Romendar ojs flogoskeri grupn.

Adale temaske vidminel pe o flogoskero magacin Roma sam ando 16.4. 2018. I Katharina Janoska i sendug tumenge kertscha taj i Susanne Horvath duach i sendung tumen vodinel.

O bombakeo atentato ando bersch 1995 Erbate, kaj schtar Roma pumaro ileto naschade, jek bibastalo, ham te barikano terdschivipe la flogoskera grupnake sina. Kekaj aja bari duk la flogoskera grupnake le Romendar duach ada bibastalo atentato kerdo ulo, o Roma ando fokus le pradipeske pele, phenel o Sarközi.

O Christian Klippl 2016 le Rudolf Sarköziske, savo ternon amendar gelo, ojs schero le kulturakere farajnistar le austritike Romendar palal alo. Ando kesdipe nana ada loke te kerel i farajnakeri buti ham le pomoschinipeha le Andreas Sarközistar ov igen sik le siklija, phukal o schero le betschitike farajnistar Klippl.

So duj phenen, hot o Roma ando 25 berscha but latschipe kerde pumen te etablirinel. On ojs kulurakero farajn le austritike Romendar kamna pumari buti use te kerel, kaj i flogoskeri grupn optimistisch andi cukunft schaj diken. O Christian Klippl jek barikani schajipeskeri prognosa le arte 25 berschenge tel del.