Servus | Szia | Zdravo | Del tuha | 8. oktoberi | ORF 2 Burgenland

Ov jek le lek prindscharde jazz gitaristendar taj aktivisto hi, savo le tschatschipenge le Romenge kejmpfinel. Niko atschi pre flogoske kertscha sar ov. O Harri Stojka ando juli 60 berscha phurano ulo. Taj 24 berscha „Romano Rath“, o flogoskere grupn uso völiniptscha taj o medijakero projekto „Tschibtscha“ adi andi sendung te dikel hi.

On demand | Servus | Szia | Zdravo | Del tuha | 8. Oktober

I moderatorkija Katharina Janoska tumen adi andar i dis Halbturn schukar akarel, kaj o artschijipe „Der Zauber des alten Orients“ i orijentalischi kultura taj dschivipe le kherodaschenge pascheder ando ol. Ada artschijipe schaj dschi ando 5. novemberi diklo ol.

O barikano gitaristo Harri Stojka 60 berscha phurano ulo

O alav „barikano dscheno“ leske schaj phendo ol, ov o lek barikaneder jazz gitaristo taj aktvisto le ande bescharipeske le tschatschipenge le Romenge hi. Niko atschi resto pre flogoske sar ov. O Harri Stojka ando juli 60 berscha phurano ulo.

O muschikaschi valaso resto, savo pumenge but avre kivaninen - jek ajgeni gitarisiskero cidipe, kaj ov mindschart prindschardo ol. Amen le kinstleri ande leskero kher Betschiste kherodijam.

Romano Rath ando kipo

„Romano Rath“, i avri muschikani grupn ande amari sendung andar o sudburgenlanditiko foro Erba, savi le Gustav Horvathistar taj leskere phralestar Markus Puggler-Horvath kerdi uli, hi. I muschika hi, savi amen khetan phandel taj i aundefinipe la Romana bandatar sina.

O keripeskero bersch sina 1993 phenel o Gustav Horvath taj akan ov upro barikane berscha pal dikel. Ando septemberi i banda Romano Rath ando ORF thaneskero schtudijo Tikne Martonate use o sakoberscheskero mulatintschago sina, taj odo pumari barikani muschika cidine.

Flogoskeri grupnengeri konferenca uso völiniptscha

„Baustelle Volksgruppenpolitik“ | Ando lejcti berscha vascho nevo flogoskero grupnengero tschatschipe tschule pe kertscha, phenen o fartretertscha le schov flogoskere grupnendar andar i Austrija use i presejakeri konferenc. On mangen, hot o flogoskere grupnengere loj aun asdim te on.

Te i „Arge Volksgruppen“ pumaro aunpaschlaripe le bundakere birovtschagoske presentirintscha, harne anglo völiniptscha.

Mulatintschago le Romendar & pajtaschendar

O mangipe le flogoskere grupnendar hi o tschulipengero tschatschipe Betschiste. Te o Christian Klippl, anglebeschto le Kulturakere fartajnistar le austritike Romendar uso multintschago „Fest der Roma & Freunde“ ando „Greenhouse“ ande Hirschstetten Betschiste, ada mangel.

I Journalistkija Elisabeth Vitouch ada mulatintschago, savo palo plane sina moderirintscha. But politikerttscha use sina, sar o Michael Ludwig, Jürgen Czernohorszky taj i SPÖ schtotiskeri sekreterkoja Muna Duzdar. Duzdar ande pro vakeripe upri bibastali situacija le Romendar andi EU upre sikatscha. Oj mangel buteder ande bescharipe le schtotendar.

Medijakero projekto "Tschibtscha“

Tschibtscha, andi nimtschki tschib „Sprachen“ o anav le medijakere projektistar le farajnistar KARIKA andi koperacija le Farajn Roma-Servicejistar taj le ORF flogoskeri grupnengera redakcijatar hi. Ofto dschene uso schtar masekengero workshop, kaj ande mindenfelitike medijakere kompetenctscha siklim on. Cil adale projektistar hi, kaj o dschene ando medijakere koji buti te laken.

Censurakero arulajipe "Romblog.at“

Ando maschkarutno septemberi o dschene andar o trin masekengero medijakero workshop ando projekto le anaveha „Romblog.at“ pumaro censurakero lil uschtidine.

Uso prikdipe ando „ORF Radiocafe“ presentirinde o journaliskiji pumare kisetinipeskere butja. I schotiskeri sekreterkija Muna Duzdar o censurakere lila prik dija. Use meg sina uso mulatintschago andar o ORF o Serdar Erdost taj andar o bundakero birovtschago i Susanne Pfanner.