Gondolipeskero than „Aspangbahnhof“ prado ulo

Jek gondolipeskero than upro aguno than le betschitike „Aspangbahnhof"istar sajt adi upro 47.035 manuscha pal te gondolinel mukel. O nacijonalsocijalistscha mukle odotar le dschenen, te le Romen taj Sintijen, ando logertscha sar Łódź (Polnija) te ledschel.

Bojd 100 berscha o „Aspangbahnhof“ Betschiste upri Landstraße terdschino, dschidokle 1977 tel phaglo lo ulo. O nacijonalsocijalistscha i srastunakeri vora uso jek than le bibastalipeske kerde. Desch esertscha manuscha odotar ando logertscha ledschim ule taj murdarde.

Palgondolipe upre oja bibastali cajt

I „Shoah" na tschak ando logertscha sina, oj te maschkarun ando foro sina, anglo atscha le nipostar“, phenel i historkija Heidemarie Uhl. Oj pal te gondolinel mukel use o adivesakero gondolipeskero tel utscharipe upro 47.035 ledschime dschene, save ande 47 transportscha - lek buteder ando bersch 1941/42 - la srastunaha ando logertscha bitschade ule. Tschak 1.073 manuscha prik dschivde.

Ando bersch 1939 i deportacija le dschidovdschendar adaj tel viklim ulo. On ando logertscha Theresienstadt, taj ando baro logeri andi Polnija Auschwitz, Treblinka taj Maly Trostinez ledschim ule. But lendar odoj murdarde ule.

Le 47.000 dschenendar tschak 1.000 manuscha pal ale. Dschene la flogoskera grupnatar le Romendar andar o „Aspangbahnhof“ ando logeri „Litzmannstadt | Łódź“ ledschim ule. Ando bersch 1943 kesdintscha akor i deportacija andar o „Nordbahnhof“.

Schoha te pobisterel o gondolipeskero bar jeka bara tablinaha kerdo ulo, savi pedar ada than informacija del. Jek upre pisinipe le deportacijankere srastunendar datumaha, cilakere thaneha taj gendo le ledschimendar sar i thaneskeri kartscha le deportacijonengere cilenca adaj te lakel hi.

09.11.16 Srastunakeri vora Aspang - fakerakeri schtacijona schitikna historijaha