Farajn „Vivaro“ | O Romnja te dschin

„Vivaro“ butschol o erschti Romnjakero farajn andi Austrija. „Vivaro“, jek krejativi anav hi, oda bescharel pe andar „Viva“ taj andar i erschti silba la Romnjatar khetan, taj afka butschol „O dschivipe le Romane dschuvlendar | o Romnja te dschin“. Andi sendung Roma sam o inicijatorkiji amen kherodine.

On demand | Roma sam | 27.2.2017

O schero taj kheraschkija le farajnistar „Vivaro“ Žaklina Radosavljević, savi Betschiste upro them ali andar i grupn Kalderasch al. Oj „Bildungswissenschaften“ upri universiteta Betsch schtudirintscha. Buti kerel oj ojs beroterkija usi Caritas. O keripe le farajnistar le Romnjajendar igen latscho aun lim ulo, phukal li. "Le dschuvlenge than pekamlo ol, kaj on schaj grupnakere procestscha entviklinen taj o schajipe len hi, pedar temtscha poroti te tschil, phenel i Radosavljević.

Palo phenipe le Vivaro aktivistkijendar dschin 80.000 Roma andi Austrija. On ham na use terdschon, hot Roma le hi. Vaschoda pharo hi o gendo tschatschikan te phenel, kitschi andi Austrija dschin. O farajn Vivaro kamla vaschoda oda problemo cilon te phutrel. o phutripe ande „Empowerment“ paschlol, phenel o schero Žaklina Radosavljević.

O farajn na tschak kamla adala butjaha ande jek koja te butschalinel, phenel i Darija Carcama Vallejos, jek angle terdscharipeskero mitglid andar o farajn „Vivaro“. Oj andar i grupn „Beasch“ al. I Carcama Vallejos „Antiziganismus“ trenerkija hi, taj te ojs integracijakero „coach“ butschalinel. Pe ar te parul ando nec i lek bareder farajnakeri buti hi, phenel i Darija Carcama Vallejos.

O lek terneder projekto le farajn „Vivaro"jistar hi "Dičimos- Sichtbarkeit. Romnja mitten in Wien“. Ada jek kipengero artschijipe hi, save le dschuvlen te sikan. I dschivipeskeri situacija le dschuvlendar i fotografkija Jenny Olaya-Peickner kertscha. Sikade on 20 dschuvla andar i flogoskeri grupn le Romendar.

I vernisasch kesdinel 18:00 orenge ando hotel Altstadt, Kirchengasse 41, ando 7. betschitiko gemajndakero becirk.

O kipi o arto di 11.00 dschi 18.00 orenge aun dikle schaj on. Andar o 21. april dschi ando kesdipe le majistar ando betschitiko Amerlinghaus papal ar tschite le on.

Link
Verein Vivaro