Roma Ball | Kher la dajakera tschibtschake

Asaj sorale sar uso Romano mulatintschago le burgenlanditike Romendar nikaj avre thaneske i Romani tschib vakerdi ol. Vaschoda i flogoskeri grupn o mulatintschago Tenuerbate igen kamen, phenel o kheraschi le mulatintschagostar Martin Horvath andar o farajn Karika le Romenge taj Sintijenge.

On demand | Roma sam | 16.1.2017

O Romano mulatintschago, akan le farajn Karikastar kerdo ol, sar ando avre berscha ta ada bersch ando „Ungarischen Hof“ Tenuerbate tel likerdo lo ulo. O Romano mulatintschago jek mulatintschago hi, kaj o Romnja/Roma taj gadsche nisaj mujsinipeskere dschumipeha ar pumen schaj parun.

Roman tschasarkija 2017 Indira Gussak

Te ada bersch na falintscha o arodipe la Romana tschasarkijatar. I Indira Rani Gussak andar o deschujek terne tschaja arodim uli. Oj ando bersch 2000 andi Uprutni Puja upro them ali. Ham lakero vodschi igen sorale la muschikake tschalal, Oj ande aja rik imar but aktivitetscha la floskera grupnake kertscha. I muschika kamla i Romani kiralkija ojs instrumento ande te bescharel, kaj pra flogoskera grupn lek feder schaj fatretinel.

O avre utschipeskero punktscha le Romane mulatintschagostar sina o bandi „Romano Rath“ taj „Improvision Balkanix“ Uso „Improvision Balkanix“ muschikaschtscha andar i Rumenija taj Macedonija use hi. O prindschardo Adrian Gaspar o schero la bandatar hi taj o erschtivar uso Romano mulatintschago Tenuerbate lo use sina.

Jek le kherodaschendar o biro Tenuerbatar Josef Horvath pe igen sorale loschantscha. Ov pe imar papal upro arto bersch loschanel.

Klippl | Regijonali politikertscha andi EU iste pumen soraleder ande bescharen

Pasche mere amar granica iste o politikertscha buteder andi infrastruktura, sar ischkola, sastipe, paj, kanal taj schtrom keren. O EU-akere loj la administracijonaha ham phare te uschtidel hi. O tikne komuntscha adaleske na bartschim hi. Ham le regijonali politikerendar ada schaj uschares, hot dschanen le te kerel, kaj o EU-akere loj projektenge te uschtiden, phenel o schero Christian Klippl uso dujto falato ando Roma sam.

Konferenca Betschiste

Jek europitiki konferenca Betschiste, kaj fartretertscha andar i flogoskeri grupn andar o vilagi, kaj i flogoskeri grupn igen bare hi, taj lengeri dschivipeskeri situacija bibastali hi, akarde te on, phenel o Klippl hot latscho ovlahi.

Ada te tema sina uso vakeripe la schtotiskera sekrterkijaha Muna Duzdar, phukal o Klippl. O internacijonali Romengero Di schaj pe adale temaska vidminlahi, phenel o Klippl.