„Berlinale-Star“ | Mujič i rupuni medva biknel

O schauschpileri Nazif Mujič, savo usi Berlinale ando bersch i rupuni medva uschtidija, iste la vasch lojengeri briga bikentscha. O kartschengero khelaschi Senadin Ćosić 4.000 Euro le vasche dija. Mujič ando film „Aus dem Leben eines Schrottsammlers“ mit kheltscha.

Igen pharo leske pelo la otscha te del, phenel ov la AFP-ake. „Ham mre tschave imar trin di nischta te hal sina“.

Na dur ando udut ojs schauschpileri

Nazif Mujič, Rom andar i Bosnija, savo srastaschengero khedaschi hi, ando bersch 2013 jeka rolake ando film „Aus dem Leben eines Schrottsammlers“ i rupuni medva uschtidija. Ov ham na dur ando udut ojs schauschpileri terdschino.

Mujič akan ojs srastaschi butschalinel taj ando di valami 3,50 euro ande lel, savenca pre tschavenge tschulo habe uschtidel. „Me mro phuro verda bikentschom, taj poar avre koji taj akor i rupuni medva“. Paloda mri briga so man hi, usi Berlinale phukatschom.

Ćosić 4.000 euro leske potschintscha

Mujič i rupuni medva ando internet 5.000 eurojenca aun bitintscha. O Senadin Ćosić 4.000 eseri eurojenca la akor uschtidija. „Me na som khedaschi, me i rupuni medva tschak kintschom , le Nazifiske te pomoschinel“ phenel o Ćosić. „Ov nasvalo mursch hi, savo pre tschavenge habe iste khinel.“ Ćosić, kamka akani i rupuni medva jeke musejumiske te del.