Romenge taj Sintijenge buteder loj pekamle on

Duach o use gejipe la flogoskera grupnatar andi Austrija te i flogoskeri grupn le Romendar bareder ol. Vaschoda te o loj le Romenge taj Sintijenge buteder iste ovnahi, phenel o Christian Klippl, anglebeschto le Kulturakere Farajnistar le Austritike Romendar.

On demand | Roma sam | 9.1.2017

O anglebeschto Christian Klippl o lek buteder dscheno le Romendar hi, savo ando bersch 2016 interviewt ulo. Palo mulipe leskere batschistar Rudolf Sarközi ov o erbinipe prik lija le Kulturakere Farajnistar le Austritike Romendar te vodinel.

Buteder betschitike sar burgenlanditike

Kekaj o Christian Klippl and 9. feberi 1963 Erbate upro them alo ov buteder betschitiko hi. Ov upre bartschim Betschiste o thaneskero dschivipe sungla ov usi familija Sarközi andi Telutni Schica. Ande duj khera upri rik le gavestar le tikne Christian jek schukar cajt tschavenca leskere nipoha sina. Odoj trin familiji trin dschi schtar tschavena sina. Jek leskere nipostar i Paula Sarközi sina, i daj le Rudolf Sarközistar.

Karjera le neve anglebeschtostar sar le phurestar hi

Sar o Rudolf Sarközi te o Christian Klippl i karijera angle 20 berscha andi gemajndi Betsch MA 48 kesdintscha. O Klippl ojs anglebeschto ando merc 2016 völim ulo.

Anglebeschto le flogoskere grupnengere bajrotistar | Interesant ham na meg arkerdo

Ando ar le berschestar 2017 vaj ando kesdipe 2018 o flogoskero grupnengero bajrot nevo khetan beschto ie ol. Akan o dujto anglebeschto le flogoskere grupnengere bajrotistar o Emmerich Gärtner-Horvath i buti dschidokle kerel. Niko peske gondi kerel sar andi cukunft o bajratiskero khetan beschipe ar te tidschol, ko o angle beschto ovla. Barikano le Klippliske hi, sar i buti le bajrotistar arditschola. Vaschoda i kanidatura uso angle beschto le bajrotistar le bajrotsmitgliderendar tel hejnginel. O bitschajipe le bajrotsmitgliderendar afka te atschel sar lo dschiakan sina, phenel o Klippl.

Autochtoni sidlungakero than na buter ojs „Parameter“ le aunprindscharipeske lim te ol

Te o use gejipeskere Roma o schtotiskere polgarengere lila uschtidine , te ojs flogoskeri grupn gende le te on. Ada ham te butschol, hot i flogoskeri grupn le Romendar te buteder loj iste uschtiden, phenel o anglebeschto Klppl.

O autochtoni sidlungakero than le aunprindscharipeske iste bejg perel taj o flogoskero grupnengero tschatschipe iste parudo ol, phenel o Christian Klippl.

„Clubbing versus Ball“

O tradicijoneli Roma - Ball sar ando bersch 2016 te ada bersch na kerdo ol. O anglebeschto Klippl phenel soske na. O erschtivar ando 23. merc 1991 o Roma - Ball kerdo ulo taj akan nan lo buter la flogoskera grupnake asaj interesant sar o erschtivar kada lo kerdo ulo, phenel o Klippl. O Kulturakereo Farajn le Austritike Romendar kamla akan jek avro drom ande te tschalal taj le ternenca buteder koji te micinel.

Roma sar naschikeraschtscha dikle on

I aktujeli diskusijona pedar o naschikeraschtscha upro Roma, save imar dur adaj andi Austrija dschin na latscho kipo sikal. Ada sa bari dar kerel taj ando pradipe na use terdschojipe uso Roméngero ajipe. Te o farajniskero dschivipe adalestar igen resto hi, phenel o Klippl use.

Link

Kulturverein Österreichischer Roma