Musejum le palgondolipeske upre jek schukar cajt

Barikane dschene andar o cilo them schaj i Rose Marie Horvath andar i Maschkarutni Puja upri rik pre imar mule Romestar Willi te prindscharel siklija. Le barikane Romengere muschikaschiske jek privati musejum kertscha.

O Toni Curtis, i Gina Lolobrigida taj i Claudia Cardinale - ada tschak jek tikno falato le barikane dschenendar hi, saven i Rose Marie Horvath te prindscharel schaj siklija. But kipi, suvenirs taj muschikakere instrumentscha i 76-berschengeri use jek kamlo privatiskero musejum andi komora le kherestar khetan kedija.

Kamipe upro erschti „mentscho“

Te prindscharel siklija oj le muschikaschi ando 1950iger berscha ande jek mojakero ande Frankfurt. „Kada ande ajom, taj ov man dikla, taj kada me le diklom - o mentscho ande tschalatscha“, phukal i Rose Marie Horvath, pedar o ersch dikipe leha.

i bari bast cidel pe sar jek lolo thav duach o dschivipe le dujendar. O Willi ojs Rom ando logeri Lackenbach ande tschapim sina. Kaj jek mojakero andar Kleinwarasdorf (becirk Uprutni Puja) pe vasch leste ande beschartscha taj afka i cili familija o naci reschim schaj prik dschivde.

Naci reschim prik dschivtscha

„O raj Kauz dikla, kaj i familija andar o logeri ari te perel. Ov len andi Telutni Puja ando vesch ande jek gadschikani vora antscha. I cili familjia prik dschivtscha taj leske igen palikeren“, phenel i Rose Marie Horvath.

Igen meresch gondolinel oj upro 60iger berscha pal, kada i Rose Marie Horvath upri rik pre Romestar ando baro foro Rom andi Italija dschivnahi. Odoj le barikane dschenen restscha: "I cajt ando Rom i lek schukareder cajt mre dschivipestar sina. Me odoj la Gina Lolobrigida, la Christine Kaufmann taj la Elke Sommer te prindscharel siklijom“.