Duzdar ande Lackenbach

„O flogoskere grupn aun definipe den, pedar o tajneri prik te dikel, taj neve perspektivtscha te dikel“, phenel i schtotiskeri sekreterkija Muna Duzdar use o sako berscheskero gondolipeskero mulatintschago ande Lackenbach. O but tschibtschengero buteder vert hi, savo ar te bauninel hi, phenel i Duzdar.

On demand | Roma sam | 21.11.2016

Ada o erschti gondolipeskero mulatintschago hi palo meripe le Rudolf Saközistar, savo söbst ando aguno Romengero logeri le nacijonalsocijalistendar ande Lackenbach upro them alo. Leskero nefe o Christian Klippl akan leskero than ojs schero le Kulturakere farajnistar le Austritike Romendar ande lija. O Klippl ada di ojs „jek di le khetanipestar“ akartscha.

Uso gondolipeskero mulatintschago, savo sako bersch i thaneskeri regirung taj o Kulturakere farajn le Austritike Romendar akarel, sina pasche o avre flogoskere grupn taj khangerengere fatretertscha andar i politika, te o thaneskero schero Hans Niessl, o thaneskero presidento Christian Illedits o Rudolf Strommer sar o aguno bundeskancleri Franz Vranitzky.

Le bundeskancleri Christian Kern uso gondolipeskero mulatintschago i schtotiskeri sekreterkija Muna Duzdar fartretintscha. „Amen akan adaj terdschojas upre jek than le bibastalipestar“, adale alavenca i schtotiskeri sekreterkija Duzdar pro vakeripe kesdintscha.

„Le valami 4.000 adaj ande tschapime manuschendar tschak 300 dschi 400 o logeri ando bersch 1945 prik tschivde“, palgondolintscha i schtotiskeri sekreterkija upro bibastalo keripe ando dujto haburi.

„Le gondolipeskere mulatintschagoha sar adaleha probalinas amen, o na angle tertschardo angle terdschardo te kerel taj te varninel, so pasirinel, te o khetanipe pharado hi“, phenel i Duzdar.

I schtotiskeri sekreterkija Muna Duzdar te upro Rudolf Sarközi pal te gondolinel mukla. Ov but berscha o schero le Kulturakere farajnistar le Austritike Romendar taj o erschti angle beschto le flogoskere grupnengere bajrotistar le Romendar sina. „Ov sina i tradimi sor, vascho aun prindschripe le Romendar ojs austritiki flogoskeri grupn“, phenel i Duzdar.

Le neve scheroske le Kulturakere farajnistar le Austritike Romendar Christian Klippl bedejtinel o bersch 2016 jek dukado bersch. I flogoskeri grupn ando bersch 2016 na tschak le Rudolf Sarközi naschatscha, amen te le farajn Ketani andi Uprutni Austrija sar le Farajn Roma Erbate naschatscham.

I klas 7B le gimnasijumistar Uprutni Puja uso gondolipeskero mulatintschago la temaha „Pobisteripe“ pumen donde bescharde. O ischkolaschtscha taj ischkolaschkiji o historischi faktscha le logeristar, le murdaripestar andi Polnija taj o khetanipeskero bedejtinipe le keripeha upre butschalinde taj odoj presentirinde.

Gondi jeke ternestar andar o logeri Lackenbach odoj ischkolaschendar phukade ule. I klas 7B kipenca o phukajipe vodinde, savo o esbe lipe taj angle periptscha le phukajipestar te dokumentirinel.

O ar le gondolipeskere mulatintschagostar jek khetane keresujakere tel paschliripeha kisetim ulo.

Ando ORF flogoskero grupnengero magacin „Servus | Szia | Zdravo | Del Tuha“ ando 11.12.2016, 13:05 orenge, ando ORF2 Burgenland jek sikajipe pedar ada gondolipeskero mulatintschago ande Lackenbach sikavla.

12.11.16 Tikni Martona | Bare raschaji mangen Romengere gondolipeskere thana
31.10.16 Ökumenischi mischa taj gondolipe ande Holzschlag

Link

Kulturverein Österreichischer Roma