Roma-Butschu | Jek kamli tradicija

O tradicijoneli Roma-Butschu ando sudburgenlanditiko gav Boslina, savo le farajnistar Roma-Service organisirim taj tel likerdo ol, ada bersch ando cajchn „muschika khetan phandel“ terdscholahi. Sajt o bersch 1991 o cile burgenlanditike flogoskere grupn, khetan pumari kultura sikan.

On demand | Roma sam | 20.6.2016

Roma-Butschu | Jek kamli tradicija

O kesdipeskero gondo adale mulatintschagostar sina taj meg mindig hi, o khetanipe upre te likerel. O Roma-Butschu, andi nimtschki tschib Roma-Kirtag, savo suboton, ando 11to juni 2016 upro mulatintschagoskero rito Schuh andi Boslina tel likerdo ulo, i kultureli identiteta la flogoskera grupnatar le Romendar sikatscha, phenel o Emmerich Gärtner-Horvath, schero le farajnistar Roma-Service.

Asaj mulatintschago sar o Roma-Butschu, sakoneske o schajipe del, pe te resel, i kultura upre te likerel taj pe te prindscharel te siklol. Diskriminacija tel baunim ol taj neve pajtaschtschage phandle on, afka o Gärtner-Horvath bajder.

Mindenfelitiki muschika | Latscho hango

I muschika upro Roma-Butschu le Romengere-muschikaschendar la prindscharda burgenlanditika bandatar Romano Rath alo. I horvacki banda Pannonix pre tradicijoneli dschija angle terdschartscha. O utschipeskero gendo le Roma-Butschujistar 2016 i kamli taj prindschardi Romni Ivana Cibulova sina.

Buteder pedar o tradicijoneli Roma-Butschu, schunen tumen hetvin andi sendung „Roma sam“ upro Radijo Burgenland.