Romeo Franz | Sinti-Aktivisto taj politikeri

Sajt 1998 o Romeo Franz le tschatschipenge le Sintijenge taj Romenge ande pe bescharel. Usar 2003 dschi 2013 o dujto angle beschto le thaneskere khetanipestar nimtschke Sintijendar taj Romendar ande Rheinland-Pfalz lo sina taj dscheno ando angle beschipe le Centrali Rotistar le Nimtschke Sintijendar taj Romendar.

On demand | Roma sam | 3.11.2014

Aktivisto & politikeri

„Mre terdschaviptscha ojs nimtschko Sinto taj o bibastale terdschaviptscha mra dajatar taj mra babatar, save o holocaust prik dschivde, o koji sina, kaj me politischi buti kerav. O esbe liptscha le Selenenca imar ande mri cajt, kada me man le polgarengere tschatschipende ande bescharahi, igen latsche sina taj vaschoda ando bersch 2011 usi partaj use gejom“, phenel o Franz. „Mri familija schov dschene ando nacijengere logertscha naschatscha“, afka o Sintijengero-aktivisto, Romeo Franz.

I Hildegard Lagrenne schtiftung

I Hildegard Lagrenne schtiftung i erschti schtiftung hi, savakere keripeskere dschene tschak Sinti taj Roma hi. Oj le gondoha kerdi uli, hot le Sinten taj Romen vasch o khetanipeskero anticiganismus taj i schelberschengeri diskriminacija te adi meg tschule sikadipeskere schajiptscha hi.

„Akardi hi i schtiftung pal i Hildegard Lagrenne (1921–2007), savi o polgarengero tschatschipeskero micinipe le nimtschke Sintijendar taj Romendar pregintscha taj savi pe le sikadipeske taj le kejmpfinipeske gejng o anticiganismus ande bescharlahi“, phenel o Romeo Franz.

„I inicijativa le schtiftungakere keripeske usar jek necverk le mindenfelitike Sintijengere- taj Romengere organisacijendar, ar geli. Duach o sikadipeskero pomoschago taj duach o kejmpfinipe gejng i diskriminacija taj o anticiganismus kamla i schtiftung jek falato uso feder keripe le sikadipeskere schajiptschendar le Sintijenge taj Romenge, butvar le tschavenge taj ternenge, use te ledschel kamla“, phenel o Franz bajder.

Buteder pedar, schunen tumen hetvin andi sendung „Roma sam“ upro Radijo Burgenland.