Khetan te vakerel, oda mro kivanipe hi

Odoj, kaj adi i Erbakeri schpita terdschol, agun i Romengeri sidlung sina. Deschuduj khera taj jek kaschtuni barakn delahi, kaj valami 120 dschi 130 dschene dschivnahi.Elektrischi schtrom taj paj na delahi, tschak jek hanig odoj sina.

On demand | Roma sam | 17.2.2014

Taj tschak varnipe odoj sina. Andar o foro jek mesujakero drom andi sidlung dschalahi, savo ando dschend, te odoj but dschiv paschlolahi, taj agun but dschiv sina, schuschardo na ovlahi, phenel o adi 59 berschengero Rom, Ludwig Horvath.

Amen igen tschore upre barschijam, ham amenge, le tschavenge schukareder sina, sar adi. Mri tschavengeri cajt igen barikani sina, mint amen oda te kerel tromahahi, so amen kamahahi, phenel o Horvath. Na delahi nisaj hosinipe, o cile khetan khelnahi pumen taj khetan likernahi. Odola tschatsche pajtaschtage sina. O phure Roma o khetan likeripe angle amnge dschivnahi, afka o Horvath bajder.

O atentat irintscha man

Mro gondo ojs Rom soraleder ulo. Akan dschanav, hot me jek Rom som taj me te use terdschojav. Te man agun valako „Zigeuner“ akartschahi, akor pedar leste gejomahi ham adi te diskutirinel leha kesdinav. Me gondolinav, hot oni o schtar mule uso Roma na ujahi valaso avrijal. Ada afka iste sina, phenel o Horvath.

Man but kivaniptscha hi

O khetan dschivipe le Romendar papal afka te ovalhi, sar lo agun sina, phenel o aktivisto Horvath. Me o tschatschikano khetan dschivipe le Romendar muaninav, savo pumenge o gadsche nan dschanen angle te terdscharel, sar oda sina. Le gadschendar kivaninav mange, hot on jefkar i joma keren taj phenen: „Tu Rom sal, taj afka, sar tu sal, pasinel!“ Me o alav integracija na dschanav buter te schunel. Ko me som, te sa upre iste dijom?, afka o Horvath bajder.

Buteder pedar, schunen tumen andi adivesakeri senundung „Roma sam“ upro Radijo Burgenland.