Internacijonali di le gondolipestar upro opfertscha le holocaustistar

Angle 69 berscha, ando 27to jeneri 1945, o lejcti prik dschivde le logeristar Auschwitz-Birkenau le sovjetischi nimcendar putrim ule. Adi amen upro cile manuscha palgondolinas, save opfertscha la nacijonalsocijalistischi diktaturatar ule

Amen Sinti taj Roma le dschidovtschenca o glajchi bibastalo terdschavipe le sistematischi murdaripestar ando and limo nacijonalsocijalistischi rajipe Europa, ulavas. Thana sar Auschwitz, Majdanek, Treblinka, Dachau, Buchenwald vaj Bergen-Belsen simbolischi le holocaustiske amare tschulipeske terdschon, kaj epasch milijoni manuscha andar i cili Europa, opfertscha ule, phenel o Romani Rose ande pro vakeripe upro Raoul Wallenberg than ande Stockholm.

Sar nisaj avro tschulipe andi Europa o Sinti taj Roma ando sako diveseskero dschivipe la diskriminacijake, le khetanipeskere argranicalipeske taj le mindenfelitike formtschenge le rasismusistar, ar bescharde hi. Muguli regirungakere partaji populismus upro schero amare tschulipestar traden, kaj politischi jerinipe andral te uschtiden. Ada te use ledschel, gejng Sinti taj Roma terdscharde rasistischi diskriminacijakere strukturtscha dur ando maschkaripe le khetanipestar te ledschel taj bibastale demokracijakere partaji te soralisarinel. Jek nevi dimensijona rasistischi motivirime bibastale tradiptscha o murdariptscha le Romendar sina, sar le angle poar berscha ando Ungriko pasirinde.

Amaro cil iste ol, hot o Sinti taj Roma ando cile europitike schtotscha ando nacijonali gondo lengere hajmatakere vilagendar upre lim on: ojs integrali falato la ajgeni historijatar taj la ajgeni kulturatar. Tschak afka pedar o argranicalipe taj o rasismus andi cukunft schaj jerinas.