Uschtidaschi la Berlinalejatar 2013 Nazif Mujić mulo

O schauschpileri le filmistar „Aus dem Leben eines Schrottsammlers“ mulo hi. Ov ande ada dokumentarfilm khetan pra Roma familjaha jek falato andar pro dschivipe khelel taj vaschoda i rupuni medva uschtidija. Ov ham paloda meg mindig ande tschoripe iste dschivlahi.

Palo jerinipe i familja andi germanija vascho asil aunrodine, ham on na o asil uschtidine taj o Mujić pra Romnaha taj pre tschavenca papal upro drom pe kertscha andi Bosnija 125 kilometertscha sudikon Sarajevojatar. Paloda ov le nedijenge phukatscha, hot ov pri rupuni medva 4000 eurojenge te biknel kamla, kaj la familija igen tschule loj le prik dschivipeske hi.

Ande Berlin kada schunde , hot o Nazif Mujić ando 18. Feberi 2018 mulo igen brigaschne le sina, phentscha i Berlinale. Ov kurkeste mule laklo ulo, phenel leskero cousin Mehmed Mujić le nevipeskere portaliske Klix.ba (Sarajevo).

O Mujić kamlahi, use i ada berscheskeri Berlinale te ladel, kaj ov schaj pedar pro pantsch berschengero dschivipe le patijaripestar schaj phukal. Ov peske busiskere tikets kintscha, phentscha lo. I Berlinale tschetertekon kesdintscha taj dschi kurkeste dschal.