Gondolipeskero than le palgondolipeske le dschidovtschenge ande Mattersburg

Ande Mattersburg kurkeste jek gondolipeskero than le palgondolipeske le agune dschidovtschengere gemajndenge ando foro prado ulo. Valami 500 dschidovtscha andar Mattersburg ari tradim ule, sa lendar lim ulo taj murdarde len. Use pro vakeripe phentscha o bundakero presidento Alexander Van der Bellen, „ada schoha pobisterdo ovla taj ada schoha tromal papal jefkar te al“.

But dschuminel, te gondolintschal, sar o dschidovtschengero nipo vascho „November-Pogroms“ pumari pativ, pumaro kher, pumare tschatschiptscha, pumari hajmat taj but pumare dschivipestar naschade, phenel o bundakero presidento. Ov anava but manuschendar upre genel, save andi naci cajt ande Mattersburg murdarde ule. Sar o opfertscha te o tetertscha austritike sina.

I botschofterkija le schtotistar Israel, Talya Lador-Fresher, pe loschane sikal pedar o but dschene uso pradipe le gondolipeskere thanestar. Kaj i dujti, triti generacija le austritikendar pumari palutni cajt upre butschalinen taj pumen odoleske terdscharen, „jek igen barikano cajchn hi“, phenel i botschofterkija.

Jek ar mangli cajt hi andi Europa, phenel o presidento la israjelischi kultusgemajndatar Oskar Deutsch. „Rechte“ partajtscha soraleder on. Vaschoda barikano hi, asave projektenca te gondolinel.

Igen barikano hi, terne manuschen i dschidovtschengeri historija taj o schitikno kapitl la austritika palutna cajtatar pascheder te anel, phenel o thaneskero schero Hans Niessl (SPÖ). „O palgondolipe odoleske hi, kaj amen ada schoha te pobisteras so jefkar imar sina.“

O gondolipeskero than upre oda than kerdo ulo, kaj i aguni „Synagoge“ ande Mattersburg sina. I „Synagoge“ sina, sar te o bari falato le dschidovtschengere virtlistar, 1940 schprengim ulo. O gondolipeskero than andi forma trin groboskere seulendar taj jeka vudareskera karikatar le Michael Feyeristar kerdo ulo. Feyer o loj upre tradija taj o projekstiskero schero adale projektistar sina.