Gondolipe upro Rudolf Sarközi

Angle jek bersch, ando 12to merc, i flogoskeri grupn le Romendar taj Sintijendar le prindscharde anglebeschaschi, keraschi andi flogoskeri grupnakeri politika taj le na khine kejmpferi le tschatschipenge leskera flogoskera grupnake Rudolf Sarközi naschatscha. Andi sendung „Roma sam“ upre leste gondolim ol.

On demand | Roma sam | 13.3.2017

Roma sam upro gondolipe upro Rudolf Sarközi falati jeke upre lipestar, savo ando ORF Ö1 ando bersch 2007 kheldo ulo, adi pasche tumenge anel.

Sridon, ando 15to merc, o Kulturakero Farajn le Austritike Romendar upre leskero keraschi taj anglebeschaschi Rudolf Sarközi gondolinel. Leskere pajtaschtscha, o bauninipeskero foroskero rot Michael Ludwig, o Caspar Einem, aguno bundakero ministeri, o Rudolf Edlinger, aguno bundakero ministeri taj i fischgaroschkija Vera Scheiber upre leste pal gondolinen. O Gerhard Baumgartner, schero le DÖW-istar, duach o kirati vodinel. O manuscha, lileha akarde on. Arto kurko Roma sam pedar phukal.

Romengero phutschajipe | Schtotiskeri sekretarkija Duzdar: „Man loschanel“

Ando kisetinipe le septemberistar i schtotiskeri sekretarkija Muna Duzdar i Romengeri dialogiskeri seletoskeri forma kesdintscha. Le online-portaliha la Romengera dialogiskera seletoskera formaha o bundakero kancleriskero birovtschago o schajipe te del kamla, hot o dschene uso bajder entviklinipe la Romengera inklusijonatar mit butschalinen. Usar o 28to septemberi dschi uso 28to novemberi 2016 online o schajipe dija, i Romengeri-strategija 2020 te bevertinel taj te diskutirinel.

Akan o resultatscha le pradipeske sikade ule. Upri Romengeri dialogiskeri seletoskeri forma ande duj masektscha valami 1000 dschene o schajipe nucinde, pumare gondi ande te andel. 98 lendar, komentartscha tel dine, a.b. uso phutschajipe aktivi le sina. Ada gendo loschanel man, phentscha i schtotiskeri sekretarkija Muna Duzdar, savi o phutschajipe inicijirintscha.

Pekanschago ando sikadipeskero- taj butjakero than

O phutschajipe ojs hangoskero barometeri koncipirim ulo, vaschoda te o phutschajiptscha loke sina, phenel i Susanne Pfanner, schero le nacijonali Romengere kontaktiskere thanestar ando bundakero kancleriskero birovtschago.

Upro erschti than le phutschajiptschendar terdschol o sikadipeskero than. 66 dschene o pekanschago diken, uso sikadipeskero than aun te bescharel. Taj so na nevipe hi, o butjakero than upro dujto than hi. 53 dschene ando than la butjatar pekanschago diken.

Empowerment le dschuvlendar la inklusijonake 18 palvakeriptschenca taj ternendar 12 palvakeriptschenca o avre thana ande len. La Muna Duzdarke na butschol ada jek tschatschikano vertinipe le duj temendar.

But dschene le phutschajipestar buteder taj soraleder hango uso keripe la Romengera dialogiskera seletoskera formatar pumenge kivaninen, so le temengere arodipeske taj o formtscha le khetan bescharipendar resel. A.s. o temtscha na tschak le pradime butschaschendar, ham te le organisacijendar, save use hi, ar kerde te on, vaj tschuleder birovtschagoskero vakeripe uso khetan beschariptscha ando muj lim te ol. Le scheroske le nacijonali Romengere kontaktiskere thanestar Pfanner, ada resultato i rik sikal.

O prik butschalimo strategijakero papruschi pal adala resultatscha uso ministerengero rot behandlim taj use jek falato le regirungakere programistar ol, phentscha i Duzdar.