Nevo anglebeschto Gärtner-Horvath | Tschak autochtoni ando flogoskero grupnengero bajrot

O nevo anglebeschto le flogoskere grupnengere bajrotistar Emmerich Gärtner-Horvath na bari vrischtscha avral kerel, kaj pe godschikan upro paragraftscha le flogoskere grupnengere tschatschipestar likerel. Ando bajrot tschak autochtoni flogoskere grupnengere dschene troman bitschade te ol.

On demand | Roma sam | 6.3.2017

Emmerich Gärtner-Horvath andar o farajn Roma - Service tschetertekon uso beschipe Betschiste ando BKA le flogoskere grupnengere bajrotistar jeke alaveha le anglebeschtoske arodim ulo. Sajt o mulipe le Rudolf Saközistar ando 12.3.2016 niko i funkcijona ande lija.

O arkeripe le bajrotistar erscht akan schaj resto ulo, phenel o nevo angle beschto Gärtner-Horvath ando vakeripe la Susanne Horvathaha andar Roma sam.

Leskero fatreteri le bajrotistar o Andreas Saközi hi, ov o schero le Kulturakere farajnistar le austritike Romendar hi.

Tschak autochtoni ando flogoskero grupnengero bajrot
O flogoskero grupnengero politikeri Emmerich Gärtner-Horvath na bari vrischtscha andral kerel, hot ov pe upro paragrafscha le flogoskere grupnengere tschatschipestar likerel. Afka tschak autochtoni flogoskere grupnengere dschene ando bajrot bitschade schaj on. Uso flogoskere grupnengere dschene genel o anglebeschto le Romen, Sinti taj Lovara Betschiste taj anda o Burgenland, phenel o Emmerich Gärtner-Horvath.

Buteder sendungakeri cajt ando ORF
O fa necinipe le cile Romane organisacijendar, te le migrantengere organisacijendar, ande lengere butja gejng o rasismus ando sakodiveskero di taj diskriminacija upro butjakero foro jek baro armangipe hi, pasche o armeripe la dajakera tschibtschatar „Romani“. O nevo anglebeschto kivaninel peske buteder sendungakeri cajt andi Romani tschib le Romenge taj Sintijenge ando ORF. Afka i Romani tschib buteder ando dschivipe le pradipeske te schunel ovlahi. Jek ORF-televisakeri sendung meg falinel, phenel o Emmerich Gärtner-Horvath use.

Romnja taj Roma khetan vaj na khetan
Upro aunvakeripe jeka ajgeni agendatar le Romnjajenge phenel o dugo berscheskero schero le farajn Roma-Servicejistar Gärtner-Horvath, hot o Romnja le autochtoni organisacijindar taj te ando familji asaj than ande line sar o murscha. Ada khetano keripe normaliteta use amende hi.

2018 papal arodim ol
O flogoskero grupngero bajrot le Romenge ando bersch 2018 papal neve khetan beschardo ol. O bundakero birovtschago arodla, ko le dschenendar ando bajrot le flogoskere grupnenge vakerla. Ada butschol, hot te i funkcijona le anglebeschtostar papal uso völinipe terdschol.

8. März | Internacijonali dschuvlengero di

Sajt 8. merc 1921 o internacijonali dschuvlengero di oficijeli tel likerdo ol. Ov upro inicijativa socijalistischi organisacijendar kerdo ulo, harnon anglo erschti thmeskero haburi, kaj o glajchi tschatschiptscha sar völinipe le dschuvlenge uschtidim te ol. Andi sendung phukan Romnja vascho bedejtinipe le 8. mercistar.

Angloskero kipo Ceija Stojka
Jek lendar i Nadine Papai hi, savi o schero andar i „Gesellschaft für bedrohte Völker Österreich“ hi. "O 8. merc sikal amenge, hot o 8. merc na korkore alo, phenel li. I socijal- taj kulturanthropologinkija, savakero dad andar Holzschlag al, dikel la Ceija Stojka ojs angloskero kipo. I Stojka antscha 1988 pra kenvaha „Wir leben im Verborgenen“ ojs erschti Romni o „Porajmos“ ando pradipe. I Ceija ojs Romni amenge oda angle dschivtscha, saj barikano hi, uso ajipe katar ajs te terdschol, i Nadine Papai igen sorale ari adsdel.

O schero le erschti farajnistar „Vivaro“ Žaklina Radosavljević upre sikal upri trijalvakeri diskriminacija le dschuvlendar.

La „anticiganismus“ trenerkijake Darija Carcama Vallejos o 8. merc jek dschuvlakero di hi, savo sikal, hot o kejmpfinipe schoha ar ovla.

Staatssekretärin Duzdar gratuliert Gärtner-Horvath
Verein „Vivaro“ | Es leben die Romnja