Mure i povodja po jaki nevrimeni

Zemaljska centrala za sigurnost je u minuloj noći registrirala 342 ognjogasne intervencije širom Gradišća. Ognjogasci su bili pozvani da spumpaju poplavljene pivnice ili da pomažu onde, kade je bila udrila strijela. U Pandrofu na primjer su ognjogasci pomagali doma. Ali i u Niuzlju je pao rekordni broj od prik 100 litrov godine na kvadratni metar.

U južnom Gradišću su bili osebujno jako pogodjeni kotari Borta i Novi Grad. I u Čembi, kade je čer srijedu palo 76 litrov na kvadratni metar, su ognjogasci morali spumpati pivnice, veli ognjogasac Herman Herić. Problem da je bio onde i zbog podzemne vode, ka je isto prouzrokovala povode u pivnica.

Ognjogasci su se od čer do danas borili protiv vode

U Čajti su ognjogasci još do kasnoga otpodneva bili u službi. O situaciji onde je rekao Bernd Balasković, ki je peljao intevenciju, da jur cijeli dan pumpaju. Kroz selo da curi potok, tako da je bilo sve pod vodom. Ali i zbog podzemne vode da je bila situacija problematična.

Bernd Balasković je jedan od oko 30 ognjogascev iz Čajte, ki su se od čer do danas borili protiv vode. U hrvatski seli sridnjega Gradišća ov put nisu imali toliko vode i povodju kot ljetos u maju. Ognjogasci su na primjer u Šuševu morali spumpati nekoliko pivnic, a u Malom Borištofu je voda poplavila igrališće čuvarnice.

Zemaljski poglavar Hans Niessl je žrtvam povodje obećao pripomoć za slučaj katastrofe. Njegov zamjenik Franz Steindl je hvalio djelo gradišćanskih ognjogascev. Stoprv u maju ovoga ljeta su bile jake poplave u južnom Gradišču.